उद्योग मंत्री श्री देवांगन ह मुस्लिम समाज के सामुदायिक भवन के करिन लोकार्पण

कोरबा, 15 सितमबर 2024। वाणिज्य उद्योग अऊ श्रम मंत्री श्री लखन लाल देवांगन ह कोरबा  के वॉर्ड नंबर 53 दर्री कनवेयर बेल्ट तीर नवनिर्मित मुस्लिम समाज के सामुदायिक भवन के फीता काटके लोकार्पण करिन। संगेच किचन शेड अऊ आन विकास काम मन बर विधायक निधि ले 15 लाख रुपिया देहे के घोषणा करिन।

मंत्री श्री देवांगन ह कार्यक्रम ल संबोधित करत कहिन के सामाजिक कार्यक्रम के संग समाज के उत्थान बर कई ठन काम पूरा शहर म पास करे जात हे। पाछू 8 महीना म वार्ड मन के विकास काम मन बर 200 करोड़ रूपिया ले जादा के स्वीकृति देहे गए हे, संगेच जेन समाज के मांग रहिस वो सबो भवन ल घलोक स्वीकृति देहे गए हे। मुख्यमंत्री श्री विष्णु देव साय ह हर समाज के उत्थान बर संकल्पित हे। समाज के सबो वर्ग ल विकास के मुख्यधारा ले जोड़के ओ मन ल सशक्त अउ समृद्ध बनाए बर हम संकल्पित हन।

ए बेरा म नूरानी मस्जिद कमेटी के प्रमुख मुल्तान कुरेशी, सुल्तान कुरेशी, इकबाल मेमन, यूसुफ ख़ान, ईश्वर साहू, नारायण सिंह, तुलसी ठाकुर, पार्षद ममता साहू, कविता नारायण, पार्षद नरेन्द्र देवांगन, बुधवार साय यादव, गोलू पांडे समेत आन जनप्रतिनिधि उपस्थित रहिन।