जशपुर, दिव्यांग जन मन के जीवन ल आसान अऊ सुखमय बनाए खातिर मुख्यमंत्री श्री विष्णुदेव साय ह जशपुर के ग्राम बगिया म 07 दिव्यांग मन ल निःशुल्क बस पास बांट के ओ मन ल शॉल, श्रीफल भेंट करके सम्मानित करिन।
कार्यक्रम म मुख्यमंत्री ह दिव्यांग लक्ष्मी बाई, विकास नायक, तिजनु राम, देव कुमार चौहान, संध्या सिदार, सोनम सिदार, सुशीला तिग्गा, सुशीला बाई नायक, पूजा नारंगे संग वरिष्ठ नागरिक मन ल निःशुल्क बस पास बांटिन। पहली पइत सिकलसेल ले पीड़ित 18 बछर के सोनम सिदार अउ 08 बछर के बालक देव कुमार चौहान ल घलोक बस पास दीन।
जानबा हे के छत्तीसगढ़ शासन समाज कल्याण विभाग कोति ले दिव्यांगजन अधिकार अधिनियम 2016 के तहत ‘दिव्यांगजन निःशुल्क बस-यात्रा पास’ के प्रावधान करे गए हे। जेमां परिवहन विभाग के समन्वय ले दिव्यांगजन मन बर निःशुल्क बस-यात्रा पास अउ रेल यात्रा बर रियायत प्रमाण पत्र बनाये जात हे।
दिव्यांगजन मन के दिक्कत होइस दूर
सिकलसेल बीमारी ले ग्रसित चराईडांड निवासी सोनम सिदार ह कहिस के ओ ल ईलाज बर घेरी-बेरी जशपुर या आन बड़े शहर म इलाज बर जाना परत रहिन। निःशुल्क बस पास मिल जाय ले ऊंखर आए जाय के खरचा के दिक्कत खतम हो जाही अऊ उंखर पढ़ाई घलोक नियमित रूप ले हो सकही। अस्थिबाधित दिव्यांग विकास नायक ह कहिस के पहिली ओ ल कहूं आए जाय म दिक्कत होवत रहिस। अइसन म निःशुल्क बस पास मिले ले वो ह जरूरी काम बर आना जाना कर सकही। वो ह निःशुल्क बस पास बर मुख्यमंत्री श्री साय के आभार व्यक्त करे हे।
