मुख्यमंत्री ह एंटी नक्सल ऑपेरशन म देर रात लीन उच्च-स्तरीय बैठक
मुख्यमंत्री ह माओवाद के खिलाफ बड़का कामयाबी म सुरक्षाबल मन के अदम्य साहस ल सहराईन
रायपुर, मुख्यमंत्री श्री विष्णुदेव साय ह पाछू रतिहा अपन निवास कार्यालय म नारायणपुर अऊ दंतेवाड़ा जिला मन के सीमा म अबूझमाड़ क्षेत्र म सुरक्षाबल अऊ माओवादी आतंकी मन के बीच होए मुठभेड़ के घटना ल लेके उच्च-स्तरीय बैठक लीन। बैठक म पुलिस महानिदेशक अऊ मुख्यमंत्री सचिवालय के वरीष्ठ अधिकारी मौजूद रहिन।
मुख्यमंत्री श्री साय ह बैठक म घटनाक्रम के विस्तार ले जानकारी लीन अऊ माओवादी आतंकी मन के विरुद्ध सफल ऑपेरशन म सुरक्षाबल के शौर्य अउ अदम्य साहस के सराहना करत बड़का कामयाबी बर ओ मन ल बधाई दीन। मुख्यमंत्री ह बैठक के समय सुरक्षाबल के जवान मन के कुशल-क्षेम घलोक पूछिन। उमन पुलिस महानिदेशक ल निर्देशित करिन के छत्तीसगढ़ म माओवादी आतंकवाद के खिलाफ कार्रवाई म कोनो ढिलाई झन बरतव। संगेच नक्सलवाद के खिलाफ लड़ाई म जवान मन बर जरूरी संसाधन मन के व्यवस्था म कमी झन होवय।
मुख्यमंत्री श्री साय ल ए दौरान पुलिस के अधिकारी मन ह बताइस के ओ ऑपेरशन म अभी तक के सर्चिंग म 28 ले जादा माओवादी मन के मरे के सूचना मिले हे। माओवादी मन के खिलाफ ये देश के अब तक के सबले सफल ऑपेरशन होही। मुख्यमंत्री ल बताए गीस के छत्तीसगढ़ म नक्सलवाद के सफाया बर एंटी नक्सल अभियान सरलग चलत हे। सुरक्षाबल के जवान मन कोति ले माओवादी मन के पूरा साहस के संग डटके मुकाबला करे जात हे।
मुख्यमंत्री ह बैठक म स्पष्ट तौर म कहिन के छत्तीसगढ़ ल नक्सलवाद ले मुक्त करे खातिर हमर सरकार दृढ़ संकल्पित हे। आज बीजापुर म मैं ह पुलिस जवान मन अऊ माओवादी आतंकवाद प्रभावित मनखे मन ले मुलाकात करेंव। उन सबो ल अब ये विश्वास हो गए हे के ए हिंसा आखरी होवया हे। बस्तर आज विकास अऊ शांति कोति लउहे आगू बढ़त हे। सरकार के काम ले बस्तर के जनता म नवा आस जगे हे। जनता म विश्वास बाढ़े हे के जल्दी च छत्तीसगढ़ माओवादी आतंकवाद ले मुक्त होही।
