बिहान ले जुड़के हर महीना लगभग 12 हजार रूपिया कमावत हे
कोंडागांव, बस्तर क्षेत्र के भीतर कोति शासन के जनकल्याणकारी योजना मन गांव वाले मन के जीवन म सकारात्मक बदलाव लावत हे। एमां बिहान योजना एक महत्वपूर्ण भूमिका निभावत हे, जेन नइ केवल गांव मन के विकास करत हे भलुक ग्रामीण महिला मन ल सशक्त अऊ आत्मनिर्भर बनावत हे। कोंडागांव जिला के माकड़ी विकास खंड के छोट कन गांव गुमड़ी के रहइया राधा कश्यप ए बदलाव के जीयत-जागत मिसाल हे।
राधा कश्यप अपन पति अऊ दू लइका मन के संग रहिथे, आज ओखर कुटुंब खुशहाल जीवन जीयत हे। म आज ले पांच साल पहिली हालत अइसन नइ रहिस। काबर के राधा अऊ ओखर पति मुश्किल ये दू जुवर के रोटी जुटा पात रहिन। राधा के पति घर चलाय बर खेती करत रहिस अऊ राधा के समय घर के काम-काज अऊ खेती काम म निकल जात रहिस। कुटुंब के आर्थिक स्थिति अड़बड़ खराब रहिस, फेर ए कठिन परिस्थिति ह राधा के हौसला ल कम नइ कर पाइस। वो ह कुटुंब के मदद बर कुछ करे के निर्णय लीस अऊ साल 2016 म दुर्गा स्वसहायता समूह ले जुड़ गीस। इहें ले वोखर आत्मनिर्भर बने के यात्रा के शुरुआत होइस।
बिहान योजना ले राधा के कुटुंब म आइस नवा मोड़
स्वसहायता समूह ले जुड़े के बाद, राधा ल बिहान योजना के अंतर्गत बैंक सखी बने के अवसर मिलीस। राधा ल जगदलपुर आरसेटी म 10 दिन के प्रशिक्षण दे गीस, जिहां वो ह वित्तीय साक्षरता अऊ कंप्यूटर के प्रशिक्षण लीस। ए प्रशिक्षण ह ओ ल बैंकिंग सेवा के बेहतर समझ दीस अऊ ओ ल अपन काम म दक्ष बना दीस। साल 2018 म वो ह 68 हजार रुपिया के करजा लीस अऊ छत्तीसगढ़ राज्य ग्रामीण बैंक बर बैंक सखी के रूप म काम शुरू कर दीस। राधा अब बैंक सखी के रूप म हर महीना लगभग 10 ले 12 हजार रूपिया कमावत हे। ये आय वोखर कुटुंब बर आर्थिक संबल बन गए हे। वो ह अपन आय ले अपन पति बर किराना दुकान शुरू करे म घलोक मदद करे हे। अब वोखर पति खेती के संगें-संग दुकान घलोक चलावत हे, जेखर से कुटुंब के आर्थिक स्थिति पहिली ले बेहतर हो गए हे। राधा ल बिहान योजना के तहत 2 पंचायत म 3 गांव के दायित्व सौंपे गए हे, जेकर कुल जनसंख्या लगभग 2500 हे। वो ग्रामीण बैंक अऊ डिजी-पे के माध्यम ले हर दिन डेढ़ लाख रूपिया तक के लेनदेन करथे। वोखर पास वित्तीय सेवा मन बर हर दिन करीबन 80 मनखे आथे, अऊ अब तक वो ह 503 बचत खाता खोले हे। राधा के उदीम ले अब तक लगभग 1 लाख 60 हजार डिजिटल लेनदेन हो गे हे, जेमें कुल 2 करोड़ 50 लाख रूपिया के लेनदेन होय हे। राधा ज्यादातर मनरेगा मजदूर मन के भुगतान करथे अऊ अब तक 30 हजार मजदूर मन ल ए योजना के लाभ देवाए हे। एखर अलावा, वो वृद्धावस्था पेंशन योजना के तहत हर महीना 25 मनखे मन के पेंशन घर-घर जाके भुगतान करथे। बैंक सखी के रूप म अपन काम के अलावा, राधा कॉमन सर्विस सेंटर के माध्यम ले घलोक सेवा देवत हे। वो ह अब तक 1200 ई-श्रम अऊ 800 आयुष्मान कार्ड बनाए हे, जेखर से ओ ल 30 हजार रूपिया के कमीशन मिले हे। एखर अलावा, वो ह लगभग 1000 मनखे मन ल प्रधानमंत्री जीवन ज्योति बीमा योजना अऊ प्रधानमंत्री सुरक्षा बीमा योजना के लाभ देवाए हे। ए प्रकार ले राधा ह गांव वाले मन ल सरकारी योजना मन के जल्दी अऊ सुलभ लाभ देवाए म महत्वपूर्ण भूमिका निभावत हे।
राधा ह बिहान योजना के जताइस आभार
राधा कश्यप के ये सफलता के कहानी सिरिफ वोखरेच नइ हे, भलुक उन लाखों महिला मन के हे, जेन बिहान योजना ले जुड़के आत्मनिर्भरता के दिशा म कदम बढ़ावत हें। राधा के कहना हे के बिहान योजना ह वोखर जीवन म बदलाव लाए हे। ए योजना ले जुड़े रहे के सेती वो ह अपन पति ल आर्थिक सहायता कर पाइस, वो ह राष्ट्रीय ग्रामीण आजीविका मिशन के आभार व्यक्त करत प्रधानमंत्री श्री नरेंद्र मोदी अऊ मुख्यमंत्री श्री विष्णुदेव साय ल विशेष धन्यवाद देहे हे।
