रायपुर 14 नवम्बर 2024 गुरूवार। मुख्यमंत्री श्री विष्णु देव साय ह आज सझाा नवा रायपुर के मेफेयर रिसार्ट में छत्तीसगढ़ राज्य के नवा औद्योगिक विकास नीति 2024-30 के मुँहदेखाई करीन। मुख्यमंत्री श्री साय कहीन कि हमन ये नवा नीति ल रोजगार परक अउ विजन-2047 के अनुरूप विकसित भारत के निर्माण के परिकल्पना ल ध्यान में रखत विकसित छत्तीसगढ़ राज्य के निर्माण के लक्ष्य तय करे हावन।
मुख्यमंत्री ह आगू कहीन कि यदि कोनो उद्योग एक हजार ले जादा युवा मन ल रोजगार देवत हे त हमन ओला बी-स्पोक पॉलिसी के तहत अउ जादा छूट देबोन। युवा मन ल रोजगार मूलक प्रशिक्षण उपलब्ध कराए म हमन ये नीति म प्रति व्यक्ति 15 हजार रूपिया प्रतिमाह तक के अनुदान देहे के प्रावधान तको करे हावन।
हमन पहली पइत ये नीति के माध्यम ले राज्य म पर्यटन अउ स्वास्थ्य जइसन सुविधा मन म निवेश ल तको प्रोत्साहित करे के निर्णय लिये हावन। हमर राज्य देश के बीच म स्थित हावय। अवइया बछर म हमन अपन भौगोलिक स्थिति, आवागमन के आधुनिक साधन अउ आप सबो के भागीदारी से प्रदेश ल देश के ‘‘हेल्थ हब’’ बनाए म सफल हो जाबोन। मुख्यमंत्री ह कहीन कि जगदलपुर तीर हम लगभग 118 एकड़ भूमि म औद्योगिक क्षेत्र के निर्माण प्रारंभ करे बर जावत हन। पूर्व के ‘‘न्यूनतम 20 एकड़ भूमि’’ के स्थान म अब हमन ‘‘15 एकड़ भूमि’’ म निजी क्षेत्र म औद्योगिक पार्क के स्थापना के अनुमति देहे के निर्णय ले हावन।
मुख्यमंत्री आगू कहीन कि छत्तीसगढ़ संभवतः देश म अइसन पहला राज्य हे, जेन युवा अग्निवीर अउ नक्सल पीड़ित परिवार ल स्वयं के रोजगार धन्धा स्थापित करे क विशेष अनुदान अउ छूट के प्रावधान करे हावय। अनुसूचित जाति, अनुसूचित जनजाति वर्ग के युवा मन ल स्वयं के रोजगार उपलब्ध कराए बर तको कटिबद्ध हवन। येकर बर हम इन वर्ग के उद्यमी मन ल मात्र 1 रूपिया प्रति एकड़ के दर म औद्योगिक क्षेत्र म भूमि देवत हन। मुख्यमंत्री कहीन कि हमार कोशिश होही कि उद्योग स्थापना अउ संचालन म सरकारी हस्तक्षेप न्यूनतम होवय अउ यथासंभव सेल्फ सर्टिफिकेशन अथवा ऑनलाइन माध्यम से होवय ताकि आपके उद्योग खातिर आप ल सरकार तीरन आए के आवश्यकता झन होवय।
ये बेरा म उपमुख्यमंत्री श्री अरूण साव, उद्योग मंत्री श्री लखनलाल देवांगन, वन मंत्री श्री केदार कश्यप, कृषि मंत्री श्री रामविचार नेताम, वित्त मंत्री श्री ओ.पी. चौधरी, राजस्व मंत्री श्री टंकराम वर्मा अउ मुख्य सचिव श्री अमिताभ जैन, छत्तीसगढ़ चौंबर ऑफ़ कॉमर्स एंड इंडस्ट्री के चेयरमैन श्री अमर परवानी सहित आने आने विभाग मन के अधिकारी-कर्मचारी अउ उद्योगपति मौजूद रिहिने। नवा औद्योगिक नीति के लांचिंग के बेरा म वाणिज्य एवं उद्योग विभाग के सचिव श्री रजत कुमार ह नवीन औद्योगिक विकास नीति का विस्तृत प्रस्तुतिकरण दीन हे।
