अवैध रेत उत्खनन म बड़का कार्रवाई

3 चेन माउंटेन मशीन, 7 हाइवा अऊ 2 ट्रैक्टर जब्त
राजस्व, माइनिंग अऊ पुलिस विभाग के संयुक्त टीम के कार्यवाही
मुंगेली, कलेक्टर कुन्दन कुमार के निर्देशन म मुंगेली जिला के सरगांव नगर पंचायत अंतर्गत ग्राम बासीन, सल्फा अऊ मदकू स्थित रेत घाट मन म अवैध रेत उत्खनन अउ परिवहन के खिलाफ बड़का कार्रवाई करे गए हे। राजस्व, माइनिंग अउ पुलिस विभाग के संयुक्त टीम ह दबिश देके मौका म अवैध उत्खनन करत 03 चेन माउंटेन मशीन, 07 हाइवा अऊ 02 ट्रैक्टर जब्त करे हे। जब्त सबो वाहन सरगांव थाना परिसर म अभिरक्षा म खड़े करे गए हे। संबंधित वाहन मालिक मन के विरुद्ध माइनिंग एक्ट के तहत कानूनी कार्रवाई करे जात हे। प्रशासन के ए सख्त कार्रवाई ले अवैध रेत कारोबारी मन म हड़कंप मच गए हे। कलेक्टर कुन्दन कुमार ह स्पष्ट करे हे के जिला म अवैध खनन गतिविधि मन के विरुद्ध लगातार कार्रवाई जारी रइही।