रायपुर, समाज कल्याण मंत्री श्रीमती लक्ष्मी राजवाड़े ह राजधानी रायपुर के माना कैंप स्थित शासकीय नवीन वरिष्ठजन आश्रम के उदुपहा जांच करिन। उमन आश्रम परिसर म निवासरत वरिष्ठ नागरिक मन ले मुलाकात करे उंखर समस्या सुनीन अऊ जरूरत के संबंध म जानकारी लीन।
मंत्री श्रीमती राजवाड़े ह कहिन के मुख्यमंत्री श्री विष्णु देव साय के सियानी म छत्तीसगढ़ सरकार सियान मन के सम्मान अऊ कल्याण बर पूरा प्रतिबद्धता के संग काम करत हे। हमर सरकार वरिष्ठ नागरिक मन बर अऊ जादा सुविधा उपलब्ध कराए के दिशा म तत्पर हे।
मंत्री श्रीमती राजवाड़े ह आश्रम के व्यवस्था मन म संतोष व्यक्त करत साफ-सफाई के स्थिति ल अऊ बेहतर बनाए म जोर दीन। उमन आश्रम म स्वच्छता संबंधी मानक के कठोरता ले पालन करे अउ नियमित रूप ले साफ-सफाई सुनिश्चित करे अधिकारी मन ल निर्देश दीन।
मंत्री श्रीमती राजवाड़े ह आश्रम म सियान मन ले आत्मीयता के संग चर्चा करत ऊंखर स्वास्थ्य, खानपान, मनोरंजन अउर दैनिक जरूरत मन के जानकारी लीन। ए मौका म आश्रम म निवासरत कई सियान मन ह ऊंखर आगू अपन अनुभव अऊ सुझाव साझा करिन। मंत्री श्रीमती राजवाड़े ह सियान मन के सुझाव ल गंभीरता ले लेत सहानुभूतिपूर्वक विचार करे के आश्वासन दीन। उमन आश्रम म निवास करत सियान मन ल सम्मानजनक अऊ सुरक्षित वातावरण मिलय, ए खातिर हर संभव प्रयास करे बर अधिकारी मन ल निर्देश दीन। ए अवसर म समाज कल्याण विभाग के वरिष्ठ अधिकारी, आश्रम प्रबंधन समिति के सदस्यगण अउ कर्मचारीगण उपस्थित रहिन।
सियान मन के सम्मान अऊ कल्याण बर साय सरकार हे प्रतिबद्ध: मंत्री श्रीमती लक्ष्मी राजवाड़े
