जल जीवन मिशन ह बदलिस कमार बसाहट कल्लेमेटा के हाल

अब पानी लाय खातिर दूरिहा नइ जाए ल परय, घर-घर पहुंचत हे पानी
धमतरी, धमतरी जिला के वनांचल क्षेत्र म बसे विशेष पिछड़ी जनजाति के कमार परिवार मन ल प्रधानमंत्री जनमन योजना के तहत अब पीए अऊ निस्तारी बर भरपूर पानी मिले लगे हे। जिला के कमार बसाहट कल्लेमेटा म रहइया मनखे मन ल पीए के पानी के व्यवस्था बर अपन घर ले दूरिहा जंगल, तालाब या पोखर तक जाना परत रहिस। पानी बर बहुत दूर तक जाय म लगइया मेहनत, गर्मी-बरसात-ठंड के मौसम म होवइया असुविधा मन के संगे-संग पोखर-तालाब-नाला मन के अशुद्ध पानी के सेती होवइया बीमारी मन ले घलोक मनखे मन ल जूझना परत रहिस।
तकनीकी टीम ह सर्वेक्षण करके गांव तीर एक भूजल स्त्रोत पाइस। ए अभियान के तहत कल्लेमेटा म पीए के पानी घर-घर पहुंचाए बर जल जीवन मिशन के तहत ओवरहेड पानी के टंकी के निर्माण करे गीस अऊ पूरा गांव म पाईप लाईन बिछाए गीस। अब हर एक घर म एक नल कनेक्शन हे, जेमां स्वच्छ पेयजल ऊंखर घर तक पहुंचत हे। एखर से जलजनित बीमारी मन के घटना म कमी के सेती गांव वाले मन विशेषकर लइका मन के स्वास्थ्य म सुधार होय हे। कल्लेमेटा गांव वाले मन के पानी लाय बर दूर जंगल म जाय के मजबूरी अब खतम हो गए हे। एखर से उंखर शरीरिक श्रम तो बांचबे करे हे, संगेच आए-जाए म लगइया समय ल ओ मन अब वनोपज संग्रहण, घर-गृहस्थी संभाले, लइका मन के देखरेख आदि म लगावत हें।