जशपुर, जिला के फरसाबहार विकासखण्ड अंतर्गत ग्राम पंचायत हेटघींचा के किसान धनुर्जय यादव ह महात्मा गांधी राष्ट्रीय ग्रामीण रोजगार गारंटी योजना (मनरेगा) के तहत डबरी निर्माण करवा के अपन कृषि जमीन ल सिंचाई सुविधा ले सुसज्जित कर लेहे हे। डबरी बने के बाद न केवल ऊंखर खेत मन म हरियाली लहुटे हे, भलुक उमन बहुफसली खेती अऊ मछली पालन शुरू करके अपन आय म उल्लेखनीय वृद्धि घलोक दर्ज करे हें।
धनुर्जय यादव ह बताइस के कृषि ही ऊंखर परिवार के आजीविका के मुख्य साधन हे, फेर पानी के कमी के चलते ओ मन केवल एके फसल उपर निर्भर रहिन। गांव के आन किसान मन ल डबरी योजना ले लाभ लेत देख के उहू ह डबरी निर्माण के प्रस्ताव ग्राम पंचायत म दीस। लगभग 2.97 लाख रूपिया के लागत ले बने वोखर डबरी के निर्माण म कुल 1244 मानव दिवस के रोजगार घलोक सृजित होइस।
डबरी निर्माण के बाद उमन आलू, प्याज, मिर्च, करेला, भिंडी, बरबट्टी, गोभी जइसे कई प्रकार के सब्जी मन के खेती चालू करे हें। अब ओ मन न केवल घर के सब्जी के जरूरत खुदे पूरा करत हें, भलुक अकतहा उत्पादन ल बाजार म बेचके बनेच कमइ घलोक करत हें। संगेच ओ मन मछरी पालन ले घलोक अकतहा लाभ कमावत हें।
धनुर्जय यादव के बताती “पहिली मैं केवल बारिश के भरोसे खेती करत रहेंव, फेर अब सालभर उत्पादन संभव हो गए हे। डबरी ले खेत मन ल पलोवत हन अऊ एखर से पूरा परिवार के आर्थिक स्थिति म सुधार आए हे।”
डबरी निर्माण ले ना सिरिफ खेती के दिशा बदले हे, भलुक गांव के आन किसान घलोक ए योजना ले प्रेरित होके आगू आवत हें। धनुर्जय अब अपन अनुभव ले आन गांव वाले मन ल घलोक मनरेगा जइसे योजना मन के लाभ उठाए बर प्रेरित करत हे।
डबरी निर्माण ले संवरिस किस्मत: बहुफसली खेती अऊ मछली पालन ले बाढि़स अमदानी
