धरती आबा जनजाति ग्राम उत्कर्ष अभियान ले सुदूर वनांचल तक पहुंचिस योजना मन के अंजोर

दुर्गाबाई बैगा ल मिलीस आयुष्मान कार्ड, कुटुंब ल मिलीस स्वास्थ्य सुरक्षा के नवा उम्मीद
मुंगेली, शासन कोति ले शुरू करे गए ‘धरती आबा जनजाति ग्राम उत्कर्ष अभियान’ ह सुदूर वनांचल के बैगा समुदाय के जीवन म नवा उम्मीद के किरण जगाए हे। शासन के योजना न अब पहिली ले कहूं जादा सहजता ले आखरी छोर तक पहुंचत हे। इही कड़ी म मुंगेली जिला के लोरमी विकासखंड के दुर्गम ग्राम महामाई म आयोजित शिविर ह दुर्गाबाई बइगा जइसे कई परिवार के जिंदगी ल नवा दिशा देहे हे। पहिली जिहां दुर्गाबाई ल परिवार के चिकित्सा जरूरत मन बर चिंता करना परत रहिस, उहें अब ओ मन ल अऊ वोखर परिवार ल आयुष्मान भारत योजना के अंतर्गत 05 लाख रुपिया तक के निःशुल्क उपचार प्राप्त करे के अधिकार मिले हे। ए शिविर म दुर्गाबाई के संग वोखर पति अऊ तीनों लइका कुलदीप, राजमती अऊ राममति सबो के आयुष्मान कार्ड मौका म ही बन गे।
दुर्गाबाई बैगा ह भावुक होके बताइस के पहिली हमार पास आयुष्मान कार्ड नइ होए ले इलाज कराए के चिंता हमेशा बने रहत रहिस। अब हमार पूरा परिवार ल चिन्हांकित अस्पताल मन म मुफ्त इलाज मिल सकही। ये हमार बर बहुत बड़ राहत हे। उमन प्रधानमंत्री श्री नरेंद्र मोदी, मुख्यमंत्री श्री विष्णु देव साय के प्रति आभार व्यक्त करत कहिन के अब पहली पइत योजना मन के लाभ अतका सहजता ले, बिना भागदौड़ के, गांव म ही मिल पाए हे। ए अभियान के तहत जिला के बैगा बाहुल्य गांव मन म सरलग शिविर आयोजित करे जात हे, जेमें राशन कार्ड, आधार कार्ड, सामाजिक सुरक्षा पेंशन, स्वास्थ्य योजना अऊ आन जनकल्याणकारी योजना मन ले मनखे मन ल जोड़े जात हे। कलेक्टर के मार्गदर्शन म प्रशासन जन सेवा आप मन के द्वार के भावना ले काम करत हे, जेखर से शासन के योजना मन सही अर्थ म जन-जन तक पहुंचत हे।