मुख्यमंत्री श्री साय के संवेदनशील पहल: एशिया यूथ सॉफ्टबॉल चैंपियनशिप म भागीदारी बर ₹1.70 लाख के करिन आर्थिक सहायता

बेटी, तैं आगू बढ़… हम सब तोर संग हन– मुख्यमंत्री श्री विष्णुदेव साय
मुख्यमंत्री श्री विष्णु देव साय ह अंतरराष्ट्रीय सॉफ्टबॉल खिलाड़ी शालू डहरिया ल दीस वीडियो कॉल म शुभकामना
रायपुर, छत्तीसगढ़ के बेटी अऊ 12 पइत राष्ट्रीय स्तर म प्रदेश के प्रतिनिधित्व करइया सॉफ्टबॉल खिलाड़ी शालू डहरिया के चेहरा म ओ बेरा मुस्कान के लहर दउंड़ गीस, जब खुद मुख्यमंत्री श्री विष्णुदेव साय ह ओ ल वीडियो कॉल करके न सिरिफ शुभकामना दीन, बल्कि वोखर सपना ल पूरा करे बर जरूरी आर्थिक मदद घलोक प्रदान करिन।
शालू डहरिया के चयन 14 ले 20 जुलाई, 2025 तक चीन के सिआन म होवइया एशिया यूथ सॉफ्टबॉल चैंपियनशिप बर भारतीय टीम म होय हे। छत्तीसगढ़ ले ए ओपन टूर्नामेंट बर केवल दू महिला खिलाड़ी मन के चयन होय हे, जेमें शालू डहरिया घलोक सामिल हे। फेर ए अंतरराष्ट्रीय टूर्नामेंट म भागीदारी बर जरूरी ₹1.70 लाख के फीस वोखर बर एक बड़का बाधा बन गए रहिस।
आर्थिक रूप ले कमजोर परिवार वाले शालू के पिता प्राइवेट सुरक्षा गार्ड हे अऊ माँ एक छोट कन ब्यूटी पार्लर के संचालन करथे। ए बात के बाद घलव शालू ह आठवीं कक्षा ले सॉफ्टबॉल खेलना शुरू करे रहिस अऊ अब तक एक गोल्ड मेडल संग 12 पइत राष्ट्रीय स्तर म प्रदेश के प्रतिनिधित्व करे हे।
मुख्यमंत्री श्री साय ह शालू डहरिया ल वीडियो कॉल करके कहिन “बेटी, तैं आगू बढ़… हम सब तोर संग हन। छत्तीसगढ़ ल तोर उपर गरब हे। अच्छा खेल, मोर शुभकामना तोर संग हे। देश अऊ प्रदेश के नाम रोशन कर।”
मुख्यमंत्री ह ये घलोक कहिन के राज्य सरकार बेटी मन ल केवल प्रोत्साहित नइ करय, बल्कि ज़रूरत पड़े म ऊंखर सपना ल पंख देहे बर घलोक हमेशा तत्पर रहिथे।
संवेदनशीलता के मिसाल बनिस ये पहल
मुख्यमंत्री श्री विष्णु देव साय के दिशानिर्देश उपर जल्दी अमल करत जांजगीर चांपा कलेक्टर श्री जन्मेजय महोबे ह शालू ल ₹1.70 लाख के सहायता राशि के चेक सौपिन अऊ प्रतियोगिता बर शुभकामना दीन।
शालू के माता श्रीमती अल्का डहरिया ह मुख्यमंत्री श्री साय के आभार व्यक्त करत कहिस के मुख्यमंत्री जी के संवेदनशील पहल अऊ आर्थिक सहायता ले मोर बेटी ल अंतराष्ट्रीय प्रतियोगिता म सामिल होए के सुअवसर प्राप्त होवत हे।
मुख्यमंत्री श्री साय के ये पहल बताथे के सरकार सिरिफ योजना मन के घोषणा तक सीमित नइ रहय,  ज़रूरत के घड़ी म हाथ पकड़के संग निभाथे घलव। बेटी मन के सपना ल साकार करे बर राज्य सरकार प्रतिबद्ध हे।