चितालंका के कई परिवार के भरोसा होइस पूरा, मिलीस नवा घर

दंतेवाड़ा, मुख्यमंत्री श्री विष्णु देव साय के अगुवई म राज्य म सबो वरग के विकास बर कई ठन कल्याणकारी योजना संचालित करे जात हे। मुख्यमंत्री श्री साय के मंशा हे कि केन्द्र सरकार ले मिलइया सबो योजना मन के लाभ राज्य के मनखे ल घलोक समय म मिलय, ते पाए के शासन कोति ले निरधारित समय म हितग्राही मन ल लाभ पहुंचाए जात हे। 
प्रधानमंत्री आवास योजना (ग्रामीण) 2.0 के तहत दंतेवाड़ा जिला के चितालंका ग्राम पंचायत के कई जरूरतमंद परिवार के पक्का मकान के सपना साकार होवत हे। घर हरेक मनखे के मूलभूत जरूरत मन मे ले एक हे। कइ बछर ले झोपड़ि या अधूरा कच्चा मकान मन म जीवन बितात ए परिवार के चेहरा म अब ए सौगात के खुशी के झलक साफ देखे जा सकत हे। अइसनहे मनखे मन म चितालंका के रहवइया श्रीमती सुकारी ईच्छाम के अधूरा घर के दीवार अब मजबूती ले खड़ा हो गए हे, काबर के ओखर मकान ’’प्लिन्थ’’ स्तर म आ गए हे अऊ छत के तैयारी शुरू हो गए हे। उहें श्रीमती श्यामदई नाग के घर के काम छज्जा स्तर तक पहुँच गए हे, जेखर से ये स्पष्ट हे के थोरहे समय म उंखर मकान घलोक पूरा बनके तैयार हो जाही।
एक आन हितग्राही कलजुक नेताम बर सबले बड़े खुशी के बात ये हे के ओखर घर पूरा बनके तैयार हो गए हे। अब वोखर परिवार तीर एक मजबूत, सुरक्षित अऊ सम्मानजनक घर हे, जेकर वो ह कइ बछर ले कामना करे रहिस। ये सिरिफ ईंट अऊ सीमेंट के निर्माण नइ हे, बल्कि उन सपना मन के नेंव ये जेन लंबा समय ले अधूरा रहे हे। अब ये परिवार न केवल बारिश, धूप अऊ ठंड ले सुरक्षित हे, बल्कि ओमां आत्मविश्वास अऊ गरिमा के घलोक अनुभूति आए हे। ऊंखर परिवार बर बारिश के मौसम म कच्चा घर म रहना हमेशा एक चुनौती भरे रहत रहिस। छत ले पानी चूना, ओद्दा भिथिया अऊ जहरीला जीव जंतु के खतरा हर समय बने रहय। ए समस्या मन ह ओ मन ल अक्सर चिंता अऊ असुरक्षा ले घेरे  रखय। फेर प्रधानमंत्री आवास योजना 2.0 ऊंखर जीवन म एक नवा अंजोर लेके आईस। प्रधानमंत्री आवास योजना के अंतर्गत मिले ये सौगात गांव वाले मन बर कोनो वरदान ले कम नइ हे। ये योजना आर्थिक रूप ले कमजोर तबका ल एक पक्का घर के संगें-संग ऊंखर सपना ल घलोक नवा पंख देवत हे। हितग्राही मन ह समय म ऊंखर आशियाना के सपना पूरा करे बर शासन के प्रति आभार जताए हें।