कोटरी नदी के ओ पार दुर्गम इलाका मन म घलोक पक्का घर के सपना होवत हे पूरा

बरसात म घलोक घर बनई के काम झन रूकय एखर बर करे जात हे व्यवस्था  
कांकेर, प्रधानमंत्री आवास योजना (ग्रामीण) ले जिला के दूरस्थ अउ दुर्गम क्षेत्र मन म घलोक अब सकारात्मक बदलाव दिखे लगे हे। अंदरूनी गांव मन म घलोक गांव वाले मन के पक्का घर के सपना सच होवत हे। कांकेर जिला के विकासखंड कोयलीबेड़ा के सुदूरवर्ती ग्राम पंचायत कंदाड़ी अऊ सितरम म घलोक सरकार के सहयोग ले मनखे मन के पक्का घर बनत हे। 
कोयलीबेड़ा विकासखंड के सीमा म कोटरी नदी म बरसा के पानी आए ले कई गांव मुख्य धारा ले कट जाथे। अइसन म ए गांव मन म परिवहन के सुविधा मुहैया नइ हो पाय। कोयलीबेड़ा विकासखंड म प्रधानमंत्री आवास योजना (ग्रामीण) के अंतर्गत पाछू वित्तीय साल 2024-25 म कुल 244 हितग्राही मन के घर पास होय हे। एमां ले 226 हितग्राही मन ल पहिली किस्त के राशि मिल गए हे। पंचायत अउ ग्रामीण विकास विभाग कोति ले समय-समय म हितग्राही मन के उन्मुखीकरण करके स्वीकृत आवास मन के निर्माण चालू कराए गए हे। अब तक 43 आवास म प्लिंथ स्तर तक के काम पूरा हो गए हे, 40 आवास मन म खिड़की स्तर तक के काम पूरा हो गए हे, 13 आवास म दीवार अउ दरवाजा स्तर तक के काम पूरा हो गए हे अऊ सात आवास म दीवार के निर्माण पूरा करके छत के ढलई के तैयारी करे जात हे। स्वीकृत आवास मन म ले नौ मकान के छत के ढलाई हो गे हे अऊ दू आवास म प्लास्टर के काम करे जात हे। निर्माणाधीन सबो आवास के निर्माण शीघ्र पूरा कर ले जाही। 
कोटरी नदी के ओ पार के गांव मन म बारिश म आवाजाही बिल्कुल बंद हो जाथे। बरसात म घर बनाए के काम मन म कोनो रुकावट झन आवए, ए खातिर हितग्राही मन ल प्रेरित अउ उन्मुखीकरण करके बारिश के चलते रद्दा बंद होय के पहिली स्थानीय प्रशासन के सहायता ले जरूरी सबो निर्माण समान ल सकेलवाए गए हे। केवल नेंव तक के काम पूरा होए 74 आवास मन म ले 70 बर सामान सकेल लहे गए हे। दूरस्थ क्षेत्र मन म राजमिस्त्रि मन के कमी ल देखत अइसन युवा जेन राजमिस्त्री के काम सीखना चाहत हें, ऊंखर बर प्रशिक्षण कार्यक्रम तैयार करे जात हे। राजमिस्त्री के रूप म प्रशिक्षित मनखे मन ल मिलाके ‘आवास टोली’ बनाय जाही जेखर से दूरस्थ अउ दुर्गम गांव मन म राजमिस्त्रि मन के कमी ल दूर करत प्रधानमंत्री आवास योजना के मकान मन ल समय-सीमा म तैयार करे जा सकही।