प्रधानमंत्री सूर्यघर योजना ह बदलिस जिंदगी उपभोक्ता बनत हें आत्मनिर्भर

दुर्ग, भिलाई निवासी डीके वर्मा ह अपन घर म सोलर पैनल लगाके न सिरिफ बिजली बिल म भारी कमी लाए हे, बल्कि पर्यावरण के प्रति जागरूकता के घलोक बेहतरीन उदाहरण पेश करे हे। वर्मा के मुताबिक, पहिली वोखर घर के बिजली बिल महिना म 4,000 रुपिया तक आत रहिस, फेर अब सोलर पैनल लगे के बाद ये घटके 2,000 रुपिया ले घलोक कम हो गे। वो ह बताइस के सोलर पैनल के कारण अब बिजली गोल होए के स्थिति म घलोक घर के सबो काम सुचारु रूप ले चलत हे। ये वोखर बर आर्थिक रूप ले लाभकारी साबित होय हे अऊ ऊर्जा संरक्षण म घलोक योगदान देवत हे।
सरकार ले मिलत हे सब्सिडी, आमजन उठा सकत हें लाभ
विद्युत् विभाग के अधिकारी मन ह प्रधानमंत्री सुरुज घर मुफ्त बिजली योजना के संबंध म बताए हें के ए योजना के तहत आम नागरिक अपन घर म सोलर पैनल लगाके हर महीना अवइया बिजली बिल ल आधा कर सकत हें। योजना के अंतर्गत सोलर पैनल लगाय म केंद्र अउ राज्य सरकार कोति ले सब्सिडी घलोक देहे जात हे। 1 किलोवाट सौर संयंत्र म केंद्र ले 30,000 रूपिया अऊ राज्य ले 15,000 रूपिया के सब्सिडी, 2 किलोवाट म केंद्र ले 60,000 रूपिया अऊ राज्य ले 30,000 रूपिया, 3 किलोवाट संयंत्र म केंद्र ले 78,000 रूपिया अऊ राज्य ले 30,000 रूपिया तक के सहायता देहे जात हे।
ये योजना शासन के एक महत्वाकांक्षी पहल हे, जेन नइ सिरिफ बिजली के बचत सुनिश्चित करथे, बल्कि पर्यावरण संरक्षण के दिशा म घलोक मील के पत्थर साबित हो सकत हे। आमजन ए योजना के लाभ लेवंय अऊ अपन घर म सौर संयंत्र लगवाके ऊर्जा आत्मनिर्भरता के दिशा म कदम बढ़ावंय।
कइसे करंय आवेदन?
योजना खातिर  वेबसाइट म जाके पंजीकरण करंय। अपन बिजली उपभोक्ता नंबर अऊ आधार विवरण ले लॉग इन करव। अनुमोदन के बाद स्थानीय एजेंसी सोलर पैनल के स्थापना करही। स्थापना के बाद बिल अपलोड करंय अऊ सब्सिडी के राशि सीधा आप मन के खाता म जमा होही।