जल संरक्षण म जनसहभागिता के गजब मिसाल

’’मोर गांव मोर पानी’’ महाअभियान म जनभागीदारी ले 110 बोरी बंधान अऊ 915 रिचार्ज पिट्स के निर्माण
बेमेतरा, जिला म जल संकट ले निपटे अऊ भूजल स्तर ल बनाए रखे खातिर ’’मोर गांव मोर पानी’’ महाअभियान के तहत पांच दिन म ही जन भागीदारी ले 110 बोरी बंधान अऊ 915 रिचार्ज पिट्स अउ सोख्ता गड्ढा के निर्माण करे गए हे। बड़का जनसहभागिता ले 26 जून ले 30 जून तक पांच दिन तक संचालित व्यापक जल संरक्षण अभियान म गांव-गांव म जल संचयन संरचना मन के निर्माण करे गीस। ए बेरा म बोरी बंधान, रिचार्ज पिट्स, सोखता गड्ढा जइसे वाटर रिचार्ज संरचना मन के निर्माण प्राथमिकता ले करे गीस। जनप्रतिनिधि, पंचायत सचिव, रोजगार सहायक, स्वसहायता समूह मन के महिला अऊ गांव वाले मन के सक्रियता ह ए अभियान ल जन-आंदोलन म बदल दीन।
’’मोर गांव मोर पानी’’ महाअभियान के सफलता सुनिश्चित करे बर बेमेतरा जिला के सबो विकासखंड म क्लस्टर स्तर म प्रशिक्षण कार्यक्रम आयोजित करे गए रहिस, जेमें सरपंच, सचिव, रोजगार सहायक अऊ स्वसहायता समूह मन ल जल संरक्षण के तकनीक के जानकारी देहे गीस। ए बेरा म प्रतिभागी मन ल संरचना मन के निर्माण के तकनीकी दक्षता घलोक प्रदान करे गीस, जेखर से ओ मन अपन गांव मन म ए संरचना मन ल स्वप्रेरणा ले बना सकंय। 
’’मोर गांव मोर पानी’’ महाअभियान ले बेमेतरा जिला म 110 बोरी बंधान अऊ 915 रिचार्ज पिट्स अउ सोख्ता गड्ढा के निर्माण करे गए हे। इनकर निर्माण के समय मनखे मन म अभूतपूर्व उत्साह देखे ल मिलीस। एमां भागीदारी करइया मनखे अवइया दिन म अऊ जादा जल संरक्षण संरचना मन के निर्माण करइया हे। मनखे मन ह भरोसा जताए हें के जनसहभागिता ले चलाए जात ए जल संरक्षण अभियान के दीर्घकालिक प्रभाव जल स्तर म सकारात्मक बदलाव के रूप म परिलक्षित होही अऊ जल के स्थायी उपलब्धता सुनिश्चित करे म ये मील के पत्थर साबित होही। गांव वाले मन के सहभागिता अऊ सामूहिक प्रयास ले जल संकट के स्थायी समाधान के दिशा म ये एक अभिनव अऊ प्रेरणादायी पहल हे।