सेंट्रिंग प्लेट बनिस महिला मन के स्वरोजगार के जरिया

बिहान योजना म स्व-सहायता समूह ल सेंट्रिंग प्लेट बर मिलीस करजा
धमतरी, अटल निर्माण साल म गांव-गांव म नवा निर्माण काम मन के स्वीकृति देहे जात हे। ए निर्माण काम मन म ग्रामीण महिला मन ल स्व रोजगार उपलब्‍ध कराए बर बिहान योजना म ऋण – अनुदान स्वीकृत करे जात हे। धमतरी जिला म ग्रामीण महिला मन ल आत्मनिर्भर बनाए खातिर निर्माण काम मन म उपयोग म अवइया सेंट्रिंग प्लेट के कारोबार बर ऋण ल मंजूरी देहे गए हे। स्व सहायता समूह के महिला मन सेंट्रिंग प्लेट प्रधानमंत्री आवास योजना ग्रामीण अउ आन शासकीय निर्माण काम मन म किराए म देवत हें, जेखर से ओ मन ल सरलग आमदनी होवत हे।
सेंट्रिंग प्लेट ले स्वरोजगार स्थापित करे बर स्व-सहायता समूह के कुल 58 सदस्य मन ल आरएफ, सीआईएफ अउ बैंक ऋण के माध्यम ले वित्तीय सहायता प्रदान करे गए हे। एमां धमतरी विकासखंड के 27, कुरुद के 15, मगरलोड के 7 अउर नगरी विकासखंड के 9 महिला मन सामिल हे। ए मन ल कुल 59 हजार 300 वर्गफीट नवा सेंट्रिंग प्लेट के खरीदी बर ऋण उपलब्‍ध कराए गए हे। जिला पंचायत धमतरी के मुख्य कार्यपालन अधिकारी श्रीमती रोमा श्रीवास्तव ह घलोक बताइस के प्रधानमंत्री आवास योजना ग्रामीण के तहत ए समूह मन ल सतत आर्थिक सहयोग के संगे-संग आत्मविश्वास, साहस अऊ सामाजिक सम्मान घलोक प्राप्त होवत हे। महिला मन समय म ऋण राशि के अदायगी करके अपन जिम्मेदारी के निर्वहन करत हें अऊ कुटुंब के जरूरत ल पूरा करत हें।