मनेंद्रगढ़-चिरमिरी- भरतपुर, स्वच्छ भारत मिशन ग्रामीण के तहत जिला म प्लास्टिक मुक्त समाज के दिशा म एक ऐतिहासिक कदम उठाए गए हे।
मनेंद्रगढ़-चिरमिरी- भरतपुर कलेक्टर के निर्देशन अऊ जिला पंचायत सीईओ के मार्गदर्शन म शिक्षा विभाग के सहयोग ले जिला के जम्मो ग्राम पंचायत मन म एक दिवसीय विशेष अभियान चलाए गीस जेमां जिला भर के लगभग 15000 छात्र-छात्रा मन ह घर-घर ले निकलइया एकल उपयोगी प्लास्टिक के एकत्रीकरण बर व्यापक स्तर म भागीदारी करिन। ए अभिनव पहल म न केवल छात्र-छात्रा मन पूरा उत्साह के संग आगू आइन बल्कि ऊंखर अभिभावक मन ह घलोक लइका मन के भरपूर सहयोग करके पर्यावरण संरक्षण म अपन भागीदारी सुनिश्चित करिन। लइका मन ह अपन घर ले अनुपयोगी प्लास्टिक के बोतल, पॉलीथीन के थैली अउ आन सिंगल यूज प्लास्टिक अपशिष्ट सकेल के ओ ल विद्यालय लाइन जिहां प्लास्टिक संग्रहण के बाद विद्यालय स्तर म स्वच्छता संगोष्ठी के आयोजन घलोक करे गीस। संगोष्ठी म शिक्षक मन ह लइका मन ल प्लास्टिक के दुष्परिणाम ले अवगत करात पर्यावरण प्रदूषण अऊ कैंसर जइसे गंभीर बीमारी मन ले एखर संबंध ल समझाइन अउ दैनिक जीवन म कपड़ा के थैला, दोना-पत्तल जइसे पर्यावरण अनुकूल विकल्प मन के उपयोग बर प्रेरित करिन।
छात्र मन के ए उदीम ह प्रदेश म एक नवा कीर्तिमान स्थापित करे हे काबर के पहली पइत अइसन होय हे जब एके दिन म लगभग 15000 लइका मन ह 844 किलोग्राम सिंगल यूज़ प्लास्टिक सकेल के स्वच्छाग्राही मन ल सौंपे हें अऊ आमजन ले प्लास्टिक के प्रभावी प्रबंधन अउ एखर उपयोग ल त्यागे के अपील करे हें। ये आयोजन नइ केवल पर्यावरण संरक्षण के दिशा म एक प्रेरणादायी कदम हे बल्कि जन जागरूकता के क्षेत्र म पढ़ईया लईका मन के सशक्त भूमिका ल रेखांकित करे हे।
छात्र-छात्रा मन के अजब उदीम, एके दिन म सकेलिन 844 किलो सिंगल यूज प्लास्टिक
