बिहान योजना ले बाढि़स आत्मविश्वास अउ बाढि़स आमदनी

स्व-सहायता समूह ले जुड़के कांसाबेल के महिला मन ह स्वरोजगार के रद्दा अपनाईन
जशपुर, मुख्यमंत्री श्री विष्णु देव साय के अगुवई म राष्ट्रीय ग्रामीण आजीविका मिशन बिहान योजना के तहत जशपुर जिला के ग्रामीण महिला मन आत्मनिर्भरता के मिसाल गढ़त हें। कांसाबेल विकासखंड के ग्राम सेम्हर कछार के हरियाली स्व-सहायता समूह के 11 महिला मन ह छिंद कासा ले आकर्षक टोकरी अऊ आन पारंपरिक हस्तशिल्प उत्पाद तैयार करके अपन आजीविका ल मजबूत करे हें।
समूह के सदस्य श्रीमती बालमुनि भगत ह बताइस के बिहान योजना ले जुड़े के बाद ओ मन ल स्वरोजगार के अवसर मिलीस। पहिली महिला मन केवल घरेलू कामकाज तक सीमित रहिन, फेर अब ओ मन सालाना अंदाजन 60 ले 70 हजार रूपिया तक के कमाई करत हें। ये काम महिला मन ल आर्थिक रूप ले सशक्त बनाए के संगे-संग आत्मविश्वास घलोक देवत हे।
महिला मन ह बताइन के बिहान योजना ह ऊंखर जीवन म सकारात्मक बदलाव लाए हें। समूह के माध्यम ले प्रशिक्षण, सहयोग अऊ विपणन सुविधा मिले ले उंखर उत्पाद अब स्थानीय हाट-बाजार अऊ मेला मन म लोकप्रिय हो चुके हे। महिला मन कहत हें के अब ओ मन सिरिफ घर तक सीमित नइ रहिन, बल्कि अपन पहिचान खुद बनावत हें। समूह के दीदी मन ह मुख्यमंत्री श्री विष्णु देव साय के आभार व्यक्त करत कहिन के शासन के योजना मन ले हम सशक्त अऊ आत्मनिर्भर होवत हन।