धान खरीदी के अनुमान 70 ले बढ़ाके 78 लाख मीट्रिक टन: केंद्र सरकार के बड़का निर्णय, प्रदेश के किसान मन ल मिलही लाभ

धान खरीदी म ऐतिहासिक बढ़ोतरी: किसान मन बर समर्पित डबल इंजन सरकार के बड़का निर्णय – मुख्यमंत्री श्री साय
रायपुर, प्रदेश के किसान मन बर आज एक बहुत हर्ष अऊ गरब के दिन हे। केंद्र सरकार ह खरीफ विपणन साल 2024-25 बर छत्तीसगढ़ म धान खरीदी के अनुमान ल 70 लाख मीट्रिक टन ले बढ़ाके 78 लाख मीट्रिक टन करे के ऐतिहासिक स्वीकृति देहे हे। ये निर्णय प्रदेश के लाखों अन्नदाता मन के मेहनत ल नवा पहिचान अऊ उंखर आर्थिक समृद्धि ल नवा दिशा देही।
मुख्यमंत्री श्री विष्णु देव साय ह ए अभूतपूर्व निर्णय बर प्रधानमंत्री श्री नरेंद्र मोदी अऊ केंद्रीय खाद्य अऊ सार्वजनिक वितरण मंत्री श्री प्रह्लाद जोशी जी के प्रति आभार प्रकट करिन। उमन कहिन के ये निर्णय केंद्र अऊ राज्य सरकार के “डबल इंजन” प्रतिबद्धता के सजीव प्रमाण ये, जेमां किसान कल्याण सर्वोच्च प्राथमिकता हे।
मुख्यमंत्री श्री साय ह सोशल मीडिया ‘एक्स’ म पोस्ट करत कहिन के केंद्र सरकार कोति ले 8 लाख मीट्रिक टन अकतहा धान बिसाए के स्वीकृति, हमार किसान मन के परिश्रम ल मान्यता देवइया कदम हे। ये न केवल उंखर आय म बढ़ोतरी करही, बल्कि छत्तीसगढ़ के कृषि अर्थव्यवस्था ल मजबूती देही।
उमन कहिन के राज्य सरकार सरलग किसान मन के हित म काम करत हे अऊ केंद्र सरकार ले समन्वय करत ऊंखर बर हरसंभव सुविधा ठउका करत हे। राज्य के धान उत्पादक किसान मन ल बेहतर मूल्य, समय म भुगतान अऊ सुगम खरीदी प्रक्रिया बर ठोस रणनीति बनाय जात हे। धान खरीदी सीमा म ये बढ़ोतरी प्रदेश के किसान मन के आत्मविश्वास ल बढ़ाय वाले खबर हे। ये ऊंखर मेहनत अऊ उत्पादन क्षमता म केंद्र के आस्था के संकेत हे।
मुख्यमंत्री श्री साय ह कहिन के छत्तीसगढ़ सरकार खरीदी प्रक्रिया ल पारदर्शी अऊ सुगठित बनाए रखे बर पूरा तैयारी कर डरे हे। प्रदेश के अन्नदाता मन के समृद्धि बर सरकार सरलग नवा योजना अऊ उपाय लागू करत हे।
मुख्यमंत्री श्री साय ह कहिन के किसान मन के जीवन म खुशहाली अऊ सम्मान लाना ही हमर सरकार के प्राथमिकता हे। प्रधानमंत्री श्री नरेंद्र मोदी जी के अगुवई म छत्तीसगढ़ के अन्नदाता नवा ऊँचाइ कोति आगू बढ़हीं।