शहरी स्वच्छता म छत्तीसगढ़ के लंबा छलांग, स्वच्छता सर्वे म सामिल 169 म ले 115 शहर मन ह सुधारिन अपन रैंकिंग

सर्वे म सामिल देशभर के 4,566 शहर मन के बीच राष्ट्रीय स्तर म टॉप-100 म छत्तीसगढ़ के 25 शहर
गारबेज-फ्री सिटी स्टार रेटिंग म राज्य के 62 शहर मन ह बढ़ाइन अपन दर्जा, रायपुर ल सेवन स्टार सम्मान
सिंगल, थ्री अऊ फाइव स्टार दर्जा प्राप्त शहर मन के संख्या 114 पहुँचीस, पाछू सर्वे म रहिस 71
तीन नगर निगम ओडीएफ प्लस प्लस ले वाटर प्लस श्रेणी म पहुंचिस, 163 निकाय मन ल मिलीस ओडीएफ प्लस प्लस दर्जा
रायपुर, भारत सरकार के स्वच्छ सर्वेक्षण 2024-25 म छत्तीसगढ़ ह एक पइत फेर राष्ट्रीय स्तर म दमदार उपस्थिति दर्ज कराए हे। राज्य के नगरीय निकाय मन के उत्कृष्ट प्रदर्शन के परिणाम हे के ए पइत सर्वेक्षण म सामिल 169 शहर मन म ले 115 शहर मन ह अपन रैंकिंग म उल्लेखनीय सुधार करे हे। स्वच्छता के ए राष्ट्रीय मूल्यांकन म देशभर के 4,566 शहर मन के बीच छत्तीसगढ़ के 25 शहर टॉप-100 म सामिल होए हे, जेन पउर साल के तुलना म बड़का छलांग हे, जब केवल 16 शहर टॉप-100 म आ पाए रहिस।
राज्य के 62 नगरीय निकाय मन ह गारबेज-फ्री सिटी स्टार रेटिंग म अपन दर्जा बढ़ाए हे, जबकि सिंगल, थ्री अऊ फाइव स्टार पवइया शहर मन के संख्या 71 ले बढ़के अब 114 हो गए हे। छत्तीसगढ़ के राजधानी रायपुर ह ए पइत फाइव स्टार ले बढ़के सेवन स्टार के सर्वोच्च रेटिंग प्राप्त करे हे। रायपुर ल गारबेज-फ्री सिटी श्रेणी म ये सम्मान प्राप्त होय हे, संगे स्वच्छता म ओला वाटर प्लस शहर के दर्जा घलोक मिले हे।
ए पइत बिलासपुर, कोरबा अऊ भिलाई नगर—ये तीन नगर निगम ओडीएफ प्लस प्लस ले बढ़के वाटर प्लस श्रेणी म पहुंच गे हे। राज्य के 163 नगरीय निकाय मन ल ओडीएफ प्लस प्लस के दर्जा प्राप्त होय हे, जेमें किरंदुल अऊ भाटापारा नगर पालिका अऊ कुंरा नगर पंचायत जइसे निकाय घलोक सामिल हे, जेन पहिली केवल ओडीएफ श्रेणी म रहिस। सीतापुर नगर पंचायत ह घलोक ओडीएफ प्लस ले आगू बढ़के ओडीएफ प्लस प्लस दर्जा हासिल करे हे।
पाछू डेढ़ बछर म 62 नगरीय निकाय मन ह अपन सरलग उदीम के माध्यम ले गारबेज-फ्री सिटी स्टार रेटिंग म सुधार करे हे। बिलासपुर अऊ अंबिकापुर ह अपन थ्री स्टार स्तर ल बढ़ाके फाइव स्टार करे हे, जबकि भिलाई नगर, जगदलपुर नगर निगम, जामुल नगर पालिका अऊ घरघोड़ा नगर पंचायत ह 2023-24 के सिंगल स्टार दरजा ले आगू बढ़त अब थ्री स्टार प्राप्त करे हे। उहें, धमतरी, शिबरीनारायण अऊ राजपुर जइसे शहर, जेन पहिली के सर्वे म स्टार रेटिंग म नइ रहिस, उमन सीधा थ्री स्टार श्रेणी म प्रवेश करे हे। स्वच्छता अऊ सौंदर्यीकरण के क्षेत्र म विशेष उदीम मन के चलते राज्य के 52 नगरीय निकाय ह नो स्टार ले उन्नत होके अब सिंगल स्टार दर्जा प्राप्त कर लेहे हे।
ए पइत कई नगरीय निकाय मन के राष्ट्रीय रैंकिंग म बड़ सुधार देखे ल मिलीस। साल 2023-24 म राष्ट्रीय स्तर म 649वां जगा म रहइया सिमगा ह एखर पइत 95वां रैंक हासिल करे हे। अइसनहे जशपुर 637वां ले 91वां, राजपुर 630वां ले 63वां अऊ घरघोड़ा 616वां ले 71वां जगा म आ गए हे। भिलाई-चरोदा ह अपन रैंकिंग 587 ल सुधारके 68, दोरनापाल ह 557 ले 81, दंतेवाड़ा ह 552 ले 70, जगदलपुर ह 461 ले 55, मुंगेली ह 447 ले 86, कवर्धा ह 430 ले 77, कुनकुरी ह 426 ले 84, दुर्ग ह 314 ले 80, राजनांदगांव ह 268 ले 46, भिलाई नगर ह 267 ले 22, छुरा ह 230 ले 76, प्रतापपुर ह 173 ले 62, बलरामपुर ह 65 ले 53 अऊ रायपुर ह 12वां रैंक ले बढ़के चौथा रैंक पाए हे।
मुख्यमंत्री श्री विष्णु देव साय ह राज्य के शहर मन के ए उपलब्धि ल स्थानीय निकाय मन अऊ नागरिक मन के सामूहिक उदीम मन के परिणाम बताइस। उमन कहिन के शहरी सरकार, राज्य सरकार अऊ केंद्र सरकार मिलके नवाचार मन के संग शहर मन ल स्वच्छ अऊ सुंदर बनाए बर सरलग उदीम करत हे। उमन विश्वास व्यक्त करिन के अवइया समय म छत्तीसगढ़ के शहर मन के रैंकिंग म अऊ सुधार होही अऊ ए पइत के राष्ट्रीय सफलता सबो नगरीय निकाय मन ल अऊ जादा प्रेरित करही।
उप मुख्यमंत्री अऊ नगरीय प्रशासन अऊ विकास मंत्री श्री अरुण साव ह सर्वेक्षण म उत्कृष्ट प्रदर्शन करइया नगरीय निकाय मन के सराहना करत कहिन के वित्तीय साल 2024-25 म नगरीय विकास अऊ स्वच्छता बर राज्य सरकार कोति ले 7,400 करोड़ रूपिया के राशि जारी होए रहिस, जेखर ये सकारात्मक परिणाम देखे ल मिलत हे। उमन बताइन के विभाग ह सबो नगर निकाय मन के आयुक्त अऊ नगर पालिका मन अऊ नगर पंचायत मन के मुख्य नगर पालिका अधिकारी मन ल निर्देशित करे गए रहिस के ओ मन अपन अधीनस्थ अमला के संग रोजेच बिहनिया भ्रमण करके सफाई काम मन के नियमित निगरानी करंय। श्री साव ह कहिन के विभाग के ए दुनों पहल के ए उपलब्धि म महत्वपूर्ण भूमिका रहे हे।