जनदर्शन ले लेके समाधान शिविर मन तक मनखे मन के समस्या मन के होवत हे निराकरण
मुंगेली, मुख्यमंत्री श्री विष्णुदेव साय के अगुवई म छत्तीसगढ़ म मनखे मन के समस्या मन के निराकरण तेजी ले होवत हे। एखर संगेच नागरिक मन के मांग मन म घलोक जल्दी कार्रवाई होवत हे। राज्य सरकार कोति ले जनदर्शन कार्यक्रम ले लेके समय-समय म समाधान शिविर मन के आयोजन अऊ जनता तक अपन सीधा पहुंच बनाए बर सुशासन तिहार जइसे अभियान घलोक चलाए जात हे। अइसन अभियान-कार्यक्रम मन के सेती ही छत्तीसगढ़ के दूरदराज के इलाका मन म रहइया जरूरतमंद मनखे मन ल शासकीय योजना मन के तुरंत लाभ मिल पात हे।
इही कड़ी म लोरमी विकासखण्ड के सुदूर वनांचल ग्राम बिजराकछार म आयोजित समाधान शिविर म मुख्यमंत्री श्री विष्णुदेव साय ले सुनीता यादव ह राशन कार्ड बनवाए के मांग रखे रहिस। सुनीता के आवेदन ल गंभीरता ले लेत राशनकार्ड बनाए के कार्यवाही करे गीस। जिला के बिजराकछार म आवेदन मन के निराकरण बर आयोजित विशेष शिविर म ओ मन ल राशन कार्ड देहे गीस। राशनकार्ड मिले म सुनीता के आंखी म खुशी के लहर दौड़ गइस। ओ ल अपन परिवार बर अब राशन के चिंता नइ करना परय।
अइसनहे कभू बरसा म चूहत छत अऊ ओदरत भिथिया मन के सीलन ले जूझत मुंगेली विकासखण्ड के ग्राम चकरभाठा के रहवइया धन सिंह ल घलोक नवा पक्का मकान मिले हे। धनसिंह कइ बछर ले एक जर्जर कच्चा मकान म अपन परिवार के संग जीवनयापन करत रहिस। बरसात के मौसम म ओखर घर ह दुखदाई रहय। चूहत छांधी, सीलन वाले ओदरत भीथिया अऊ जहरीला जीव-जंतुओं के डर हर दिन वोखर जीवन ल मुश्किल बनावत रहिस।
ए विषम परिस्थिति मन ले निजात पाय बर मुंगेली जिला के जनसमस्या निवारण मंच “जनदर्शन” म अपन गुहार लगाए रहिस। जिला प्रशासन ह धनसिंह के आवेदन ल गंभीरता ले लेके मानवीय संवेदनशीलता के परिचय देवत तत्परता ले कार्यवाही करिस। धनसिंह ल प्रधानमंत्री आवास योजना (ग्रामीण) के तहत तुरंत पक्का घर के मंजूरी देहे गीस। अब धन सिंह के कइ बछर जुन्ना सपना साकार होवइया हे। एक पक्का, सुरक्षित अऊ गरिमामय घर, जिहां ओखर परिवार निश्चिंत अऊ सम्मानपूर्ण जीवन जी सकही।
प्रशासन आप मन के दुवार: होवत हे सपना साकार
