15 लाख बीपीएल परिवार मन ल पहिली जइसे योजना के मिलही लाभ
रायपुर, राज्य सरकार कोति ले हॉफ बिजली बिल योजना के अंतर्गत जेन छूट देहे जात रहिस तेखर सीमा म युक्तियुक्त संशोधन करे गए हे। अब हर महीना जेन 400 यूनिट के छूट देहे जात रहिस तेकर जगा म 100 यूनिट तक के मासिक खपत म 50 प्रतिशत रियायत देहे जाही।
अभी हाल म राज्य के 45 लाख घरेलू उपभोक्ता मन म ले लगभग 31 लाख परिवार (करीब 70%) अइसन हे जिंकर खपत 100 यूनिट हर महीना ले जादा नइ हे। ते पाए के हॉफ बिजली बिल के छूट सीमा के ए पुनरीक्षण के बावजूद ए 31 लाख जरूरतमंद सामान्य अऊ कमजोर वर्ग के उपभोक्ता परिवार मन ल योजना के लाभ पहिली जइसेच मिलत रहिही। प्रदेश के लगभग 70 प्रतिशत घरेलू उपभोक्ता परिवार हॉफ बिजली योजना ले पहिली जइसे लाभान्वित होत रइहीं।
ए 31 लाख परिवार मन म 15 लाख बीपीएल (गरीबी लकीर ले नीचे) परिवार घलोक सामिल हे, जेमन ल पहिली जइसे हॉफ बिजली बिल योजना के लाभ मिलत रहिही। ए परिवार मन ल 30 यूनिट तक के मुफ्त बिजली योजना के अंतर्गत पहिली जइसे छूट मिलतेच रइही, संगेच ओ मन ल हॉफ बिजली बिल योजना के आन सबो लाभ घलोक लाभ मिलत रइही। राज्य सरकार गरीब परिवार मन ल बिजली खरचा म राहत देहे बर बाना उंचाए हे।
राज्य सरकार प्रधानमंत्री सूर्यघर मुफ्त बिजली योजना ल गति देवत हे, जेखर अंतर्गत 3 किलोवॉट या ओखर से जादा क्षमता के रूफटॉप सोलर प्लांट के स्थापना म केंद्र सरकार ले ₹78,000/- अऊ राज्य सरकार ले ₹30,000/- के कुल ₹1,08,000/- तक के सब्सिडी देहे जात हे। 2 किलोवॉट क्षमता के सोलर प्लांट म 75% (₹90,000/-) के अनुदान उपलब्ध हे, जेखर से उपभोक्ता हर महीना 200 यूनिट ले जादा बिजली के उत्पादन कर सकत हे। ये उत्पादन अभी हाल म हॉफ बिजली बिल योजना ले मिलइया सबसे अधिक छूट (400 यूनिट म 200 यूनिट के छूट) ले घलोक जादा हे।
400 यूनिट तक औसत खपत करइया उपभोक्ता मन के बिजली बिल आमतौर म ₹1000/- ले जादा होथे, जेन सोलर प्लांट के स्थापना के बाद लगभग शून्य हो जाही। ए प्रकार के उपभोक्ता हॉफ बिजली बिल योजना ले “मुफ्त बिजली बिल” योजना कोति आगू बढ़हीं, अऊ अड़बड़ दिन तक बचत प्राप्त करही।
हॉफ बिजली बिल योजना: 31 लाख सामान्य अऊ कमजोर वर्ग के उपभोक्ता मन ल पहिली जइसे हॉफ बिजली बिल योजना के मिलही लाभ
