प्रधानमंत्री सूर्यघर-मुफ्त बिजली योजना ले सुनीत लाल के बिजली बिल होइस शून्य

78 हजार रूपिया के अनुदान म अपन घर म लगवाइस सोलर रूफटॉप सिसटम
गौरेला-पेण्ड्रा-मारवाही, प्रधानमंत्री सूर्यघर-मुफ्त बिजली योजना के लाभ उठात सुंदर नगर, के रहवइया सुनीत लाल ह अपन घर म सोलर रूफटॉप सिसटम लगवाए हे। सुनीत लाल ह बताइस के संयंत्र चालू होतेच वोखर घर म बिजली उत्पादन शुरू हो गे अऊ पहिलीच महीना ओखर बिजली बिल एकदम शून्य हो गे। ए योजना के तहत ओ ल 78 हजार रुपिया के अनुदान राशि मिलिस, जेखर से ओ ल आर्थिक रूप ले बड़ राहत मिलीस। वो ह कहिस के ये योजना वोला बिजली बिल ले छुटकारा देवात हे, संगेच अकतहा बिजली ल ग्रिड म भेजके आमदनी के जुगाड़ तको बनात हे। वो ह बताइस के ओला बिजली विभाग ले योजना के जानकारी मिलीस, जेखर बाद ओ ह अपन घर के छत म पैनल लगवाइस। ये सबले बढ़िया योजना हे जेन ल सबेच अपनाना चाहही। वो ह बताइस के ये सोलर पैनल 10 साल के गारंटी के संग आए हे अऊ 2-3 बछर म एखर लागत पूरा वसूल हो जाही, ओखर बाद ये शुद्ध बचत के जरिया बनही।
सुनीत लाल ह योजना बर प्रधानमंत्री श्री नरेन्द्र मोदी अऊ मुख्यमंत्री श्री विष्णु देव साय के आभार प्रकट करत कहिस के ये योजना हर घर ल आत्मनिर्भर बनाए के दिशा म एक क्रांतिकारी कदम हे। ए योजना ले जुड़े बर उपभोक्ता ल मोबाइल एप म जाके पंजीयन करना होथे। एखर बाद अधिकृत वेंडर सोलर पैनल के स्थापना करथे। सत्यापन के बाद सब्सिडी राशि सीधा उपभोक्ता के बैंक खाता म ऑनलाइन भेजे जाथे। बता देवन के केंद्र सरकार के प्रधानमंत्री सूर्यघर-मुफ्त बिजली योजना के अंतर्गत घर के छत म सोलर पैनल लगवाए म अनुदान राशि देहे जात हे, जेखर से मनखे मन के बिजली बिल शून्य होवत हे।