खनन क्षेत्र म छत्तीसगढ़ के बड़का छलांग: साल 2024-25 म 15 हजार करोड़ ले जादा के राजस्व, नवा खनन प्रोजेक्ट ले मिलीस विकास ल नवा गति
खनिज कोनो राज्य अऊ देश के सर्वांगीण विकास के रीढ़ होथे: श्री पी. दयानंद
रायपुर, राज्य स्तरीय भू-वैज्ञानिक कार्यक्रम मंडल छत्तीसगढ़ के रजत महोत्सव के रूप म 25वां बैठक आज सिविल लाईन स्थित न्यू सर्किट हाऊस म श्री पी. दयानंद, सचिव, छत्तीसगढ़ शासन, खनिज साधन विभाग अऊ अध्यक्ष छत्तीसगढ़ भू-वैज्ञानिक कार्यक्रम मंडल के अध्यक्षता म होइस। बैठक म श्री रजत बंसल, संचालक भौमिकी अऊ खनिकर्म अऊ केन्द्र सरकार अऊ राज्य शासन के कई ठन विभाग, उपक्रम मन के प्रतिनिधि घलोक उपस्थित रहिन। बैठक के मुख्य उद्देश्य प्रदेश म खनिज संसाधन मन के बेहतर उपयोग, नवा खनन परियोजना मन के रूपरेखा तैयार करना अऊ पउर साल के उपलब्धि मन के समीक्षा करना रहिस।
बैठक म साल 2024-25 म होए खनन काम अऊ वोखर उपलब्धि मन के विस्तृत विवरण प्रस्तुत करे गीस। समीक्षा के समय ये तथ्य आगू आइस के पाछू वित्तीय साल म प्रदेश ल खनिज राजस्व के रूप म लगभग 15 हजार करोड़ रूपिया के प्राप्ति होए हे। ये उपलब्धि साल 2023-24 के तुलना म लगभग 34 प्रतिशत जादा हे। ए बढ़ोतरी ह प्रदेश के आर्थिक ढांचा ल मजबूती देहे हे, संगें-संग खनन क्षेत्र म नवा निवेश अऊ अवसर मन के दुवारी ल खोले हे। छत्तीसगढ़ राज्य म खनिज अन्वेषण अऊ खनिज दोहन के क्षेत्र म कार्यरत भारत सरकार अऊ राज्य सरकार के विभाग मन अऊ संस्थान मन के संग साल 2024-25 म करे गए भू-वैज्ञानिक काम मन के समीक्षा तको करे गीस। समीक्षा के समय जिहां साल 2024-25 के सम्पादित काम मन के उपलब्धि मन उपर चर्चा करे गीस उहें प्रदेश के खनिज मन के खोज के बर साल 2025-26 म प्रस्तावित भू-वैज्ञानिक काम मन ल आखरी रूप दे गीस।
मुख्यमंत्री के सचिव श्री पी. दयानंद ह अपन उद्बोधन म कहिन के खनिज कोनो राज्य अऊ देश के सर्वांगीण विकास के रीढ़ होथे। राज्य म स्ट्रेटजिक अऊ क्रिटिकल मिनरल के खोज राज्य म विकास के एक नवा युग के शुरूआत के संकेत देथे। उमन कहिन के छत्तीसगढ़ म खनिज अधारित नवा उद्योग मन के स्थापना बर राज्य म विद्यमान कई ठन खनिज मन के सरलग अऊ व्यवस्थित तरीका ले अन्वेषण करे जाना चाही। बैठक म उपस्थित अन्वेषण काम मन ले संबद्ध सबो विभाग अऊ संस्थान मन ले ये आग्रह करे गीस के छत्तीसगढ़ के पूर्ण विकास बर ओ मन अपन कुशलता, संसाधन अऊ उपलब्ध एकदम नवा तकनीकी मन के उपयोग करके प्रदेश के महत्वपूर्ण खनिज मन के अन्वेषण करंय। मुख्यमंत्री के सचिव अऊ खनिज सचिव श्री दयानंद ह छत्तीसगढ़ म खनिज के विकास बर काम करइया एजेंसी मन के बीच उत्पादित आंकड़ा ल साझा करे अऊ समन्वय स्थापित करे के सलाह दीन।
ए बेरा म आईबीएम रायपुर के रीजनल कंट्रोलर श्री प्रेम प्रकाश, रीजनल माइनिंग जियोलॉजिस्ट श्री डी. दास, जीएसआई रायपुर के डिप्टी डायरेक्टर जनरल श्री अमित ए धारवाड़कर, एएमडी के सेंट्रल रीजन के क्षेत्रीय निदेशक श्री एस.आर. मंथनवार संग एन.एम.डी. सी., सीआईएल, वेदांता, अल्ट्राटेक, डेक्कन गोल्ड के अधिकारी अऊ आन संबंधित विभाग के अधिकारीगण उपस्थित रहिन।
राज्य स्तरीय भू-वैज्ञानिक कार्यक्रम मंडल छत्तीसगढ़ 2025 के रजत महोत्सव के होइस 25 वां बैठक
