पीएम सुरुज घर: मुफ्त बिजली योजना ले नाथूराम साहू बनिस आत्मनिर्भर

कभू शून्य त कभू माइनस आवत हे बिजली बिल, हर महीना 3-4 हजार के बचत
महासमुंद, केंद्र अऊ राज्य सरकार के महत्वाकांक्षी प्रधानमंत्री सुरुज घर मुफ्त बिजली योजना जिला के हितग्राही मन बर बड़ राहत साबित होवत हे। ए योजना के मुख्य उद्देश्य आवासीय घर मन ल सौर ऊर्जा ले आत्मनिर्भर बनाना हे। ए योजना के तहत 5 किलोवाट तक के सोलर रूफटॉप सिसटम म केंद्र सरकार कोति ले 78 हजार रुपिया अऊ राज्य सरकार कोति ले 30 हजार रुपिया के सब्सिडी देहे जाथे।
अब तक महासमुंद जिला म 319 घर मन म सौर ऊर्जा संयंत्र स्थापित हो गे हे अऊ 230 हितग्राही मन ल सब्सिडी के लाभ मिल चुके हे। एखर से अक्षय ऊर्जा के उपयोग ल बढ़ावा तो मिलतेच हे, संगेच ऊर्जा आत्मनिर्भरता अऊ पर्यावरण संरक्षण के दिशा म घलोक बड़का कदम साबित होवत हे।
महासमुंद जिला मुख्यालय के जुन्ना रावणभांटा रहवइया नाथूराम साहू ह घलोक ए योजना के लाभ उठाए हे। वो ह अपन घर के छत म 5 किलोवाट क्षमता के सौर पैनल सिसटम स्थापित कराए हे। साहू ह बताइस के फैक्ट्री अऊ बड़का दुकान मन म सोलर पैनल देखके ओ ल प्रेरणा मिलीस अऊ 6 महिना पहिली योजना बर आवेदन करिस। पंजीकृत वेंडर के माध्यम ले सिसटम लगाय के बाद ओखर बिजली बिल अब कभू शून्य त कभू माइनस म आवत हे। वो ह कहिस के ए योजना ले हर महीना 3 ले 4 हजार रूपिया के बचत होवत हे। ये आम जनता बर कोनो वरदान ले कम नइ हे। हर परिवार ल एकर लाभ लेना चाही, जेखर से बिजली खर्च म कमी आथे अउ आर्थिक स्थिति घलोक सुधरथे। संगेच पर्यावरण के घलोक रक्षा होथे।