माँझीपारा के विद्यालय ल मिलीस खेवइया, इहां के विद्यार्थी बनहीं पढ़इया

युक्ति युक्तकरण ले शिक्षिका के नियुक्ति ले पढ़ाई होइस आसान
कोरबा, विष्णुदेव सरकार के गुरूजी मन के युक्तियुक्तकरण के नीति ह आज कोरबा जिला के माझीपारा के मछुआ परिवार मन के पढ़ईया लईका मन के पढ़ई लिखाई ल नवा दिशा दे देहे हे । कोरबा शहर ले लगभग 80 किलोमीटर दूर पाली विकासखंड के अंतर्गत ग्राम पंचायत डोंगा नाला म बड़ संख्या म मांझी परिवार निवास करथे। नाव चलाय, मछली बेचे के संग मजदूरी करके अपन आजीविका चलइया ए परिवार के लइका मन ल शिक्षा ले जोड़े शासन ह एकर बसाहट तीर ही प्राथमिक शाला चालू करे हे। अन्तिम छोर वाले ए गाँव के पाठशाला म पाछू कई साल ले पढ़ईया लईका मन के संख्या के हिसाब ले नियमित गुरूजी नइ रहिस। शिक्षक मन के कमी के सेती माँझीपारा के लइका मन के पढ़ाई तो जारी रहिस फेर ओ मन ल अइसे लगत रहिस के मानो जेन नाव रूपी प्राथमिक शाला म ओ मन सवार हे वो मझधार म फंसे हे। ओ मन ल मंजिल तक पहुंचाए खातिर एक अऊ खेवइया रूपी गुरूजी के नितांत जरूरत हे। राज्य शासन के युक्ति युक्तकरण के पहल ग्राम पंचायत डोंगा नाला  माँझीपारा के पाठशाला के पढ़ईया लईका मन बर बड़ वरदान बनके आईस। इहां एक अऊ शिक्षिका के नियुक्ति हो जाय ले मानो स्कूल ल एक अऊ खेवइया मिल गे हे, जेन ए मन ल मंजिल तक पहुंचाए खातिर महत्वपूर्ण मददगार साबित होही।