“मोर घर, मोर अभिमान” अभियान ले साकार होवत हे सपना

महिला समूह देवत हे सक्रिय योगदान
अम्बिकापुर, प्रधानमंत्री आवास योजना (ग्रामीण) अंतर्गत संचालित “मोर घर, मोर अभिमान” अभियान सरगुजा जिला म ग्रामीण परिवार मन के सपना ल साकार करत हे। ए अभियान ह केवल घर बनाए भर म नवा मिसाल कायम नइ करे हे, भलुक महिला सशक्तिकरण अऊ आजीविका संवर्धन के मार्ग ल घलोक प्रशस्त करे हे।
अब तक जिला म 31,861 सामान्य घर अऊ 2,565 जनमन घर (विशेष पिछड़ी जनजाति हितग्राही मन बर) स्वीकृत करे गए हे। एमां ले 10,704 सामान्य घर अऊ 775 जनमन घर पूरा हो गे हे, जबकि 19,476 सामान्य घर अऊ 1,660 जनमन घर निर्माणाधीन हे।
योजना के क्रियान्वयन म स्व-सहायता समूह मन के महिला मन महत्वपूर्ण भूमिका निभावत हे। अब तक 4,332 समूह सदस्य महिला मन ह अपन घर निर्माण बर लगभग 5.35 करोड़ रूपिया के करजा लेहे हें। समूह मन ह घर बनाए के संगे-संग आय सृजन के दिशा म घलोक पहल करे हें। जिला के 397 ग्राम पंचायत मन म सेंट्रिंग प्लेट काम, 18 ग्राम पंचायत मन म जनमन घर बर सेंट्रिंग प्लेट काम, 9 सदस्य मन मिलके मिक्सर मशीन संचालन अऊ 6 सदस्या मन मिलके सीमेंट अऊ गिट्टी के आपूर्ति करत हें। ए गतिविधि मन ले 470 महिला मन ‘लखपति दीदी क्लब’ के सदस्य बने हें।
ए अभियान के तहत महिला समूह मन ह आवास निर्माण ल आत्मनिर्भरता अऊ गौरव के चिनहारी बना देहे हें। विकासखण्ड अम्बिकापुर के ग्राम पंचायत किशुननगर के रहवइया श्रीमती आशा रवि ह अपन समूह ले करजा ले के टाइल्स वाला आधुनिक घर के निर्माण करे हे, जेखर से ओखर सपना साकार होय हे। अइसनहे बहुत अकन महिला मन ह योजना के लाभ उठाके सुविधायुक्त घर तैयार करे हें।
ये अभियान जिला प्रशासन के सतत मार्गदर्शन अऊ मॉनिटरिंग के परिणाम हे। कलेक्टर श्री विलास भोसकर अऊ जिला पंचायत सीईओ श्री विनय कुमार अग्रवाल के अगुवई म सूक्ष्म स्तर म प्लानिंग करके घर निर्माण ले जुड़े जरूरत मन के पूर्ति ठउका करे गए हे। “मोर घर, मोर अभिमान” अभियान ह सरगुजा जिला म ग्रामीण घर निर्माण ल नवा पहिचान देहे के संगे-संग महिला सशक्तिकरण अऊ आर्थिक विकास के सशक्त कहानी लिखे हे।