बर्तन, कपड़ा, गैस सिलेंडर अऊ चूल्हा घलोक उपलब्ध: मकान ढहे म सहायता राशि घलोक देहे गीस
रायपुर, दंतेवाड़ा म हाले म आए बाढ़ ले निपटे अऊ प्रभावित मन ल जरूरी मदद पहुँचाए म प्रशासन तत्पर रहिस। अपन विदेश दौरा के समय मुख्यमंत्री श्री विष्णु देव साय ह दक्षिण कोरिया ले वीडियो कांफ्रेंसिंग करके बाढ़ प्रभावित जिला मन के कलेक्टर मन ल जरूरी निर्देश घलोक देहे रहिन।
आज मुख्यमंत्री के दंतेवाड़ा के चूड़ी टिकरापारा पहुँचे म बाढ़ प्रभावित परिवार मन ह प्रशासन से समय म बचाव अऊ राहत पहुँचाए बर आभार व्यक्त करिन। मौजूद मनखे मन ह कहिन के सरकार के ए संवेदनशील पहल ले सबो प्रभावित परिवार सुरक्षित अऊ सकुशल हे। राहत शिविर म रहे, भोजन अऊ इलाज जइसे सबो सुविधा उपलब्ध हे।
बाढ़ पीड़ित गुप्तेश्वरी कश्यप, शालिनी शर्मा, सविता पात्रे अऊ लता सागर ह मुख्यमंत्री श्री साय ल बताइन के राहत शिविर म कोनो प्रकार के दिक्कत नइ हे अऊ अब राशन, बर्तन, कपड़ा, गैस सिलेंडर अऊ चूल्हा घलोक देहे गए हे। मकान ढहे म सहायता राशि घलोक मिल गे हे अऊ अब घर बने तक ओ मन इहां राहत शिविर म रइहीं। प्रभावित मन ह बताइन के बाढ़ आए के संगेच प्रशासन के अपील म सबो मनखे सुरक्षित ऊँच जगा म चल दे रहिन। फेर बाढ़ के पानी उतरे के बाद ओ मन ल चूड़ी टिकरापारा के छात्रावास भवन म राहत शिविर म रूके हें।
अइसनहे रीता कश्यप, द्रोपदी नाग, कुंदन गुप्ता, महेश नाग, बबीता नाग संग आन प्रभावित मन ह घलोक प्रशासन के राहत अऊ पुनर्वास उदीम मन के सराहना करत मुख्यमंत्री श्री साय ल धन्यवाद देहे हें।
मुख्यमंत्री के आगू भावुक होइस सोमड़ी सोढ़ी
मुख्यमंत्री श्री विष्णु देव साय बाढ़ प्रभावित मन ले जतका बखत मिलत रहिन ओतखे बेर चूड़ी टिकरापारा रहवइया सोमड़ी सोढ़ी के घर पहुँचिन त श्रीमती सोमड़ी सोढ़ी भावुक हो गईन। उमन बताइन के बाढ़ ले पूरा घर बूड़ गए रहिस। बाढ़ आए के एक दिन पहिली वो अस्पताल म उपचार बर भर्ती हो गए रहिस अऊ वोखर दुनों बेटी मन घलोक संग म रहिन, एखर सेती उंखर जान बच गे। अस्पताल ले ठीक होके सुकरवार के वो घर लहुटे रहिस।
सोमड़ी ह बताइस के बाढ़ के पानी म घर के पूरा सामान खराब हो गे हे। ए बीच प्रशासन ह राशन, बर्तन, कपड़े, गैस सिलेंडर अऊ चूल्हा उपलब्ध कराए हे। संगेच राहत शिविर म नाश्ता, भोजन अऊ इलाज के सुविधा घलोक देहे जात हे। ए आपदा के घड़ी म सरकार के सहायता बर श्रीमती सोमड़ी ह मुख्यमंत्री श्री विष्णु देव साय के प्रति आभार प्रकट करे हे।
