मुख्यमंत्री श्री साय ह पहिली प्रांत प्रचारक श्रद्धेय श्री शांताराम जी ल दीन श्रद्धांजलि

श्रद्धेय शांताराम जी के पार्थिव शरीर म पुष्पचक्र अर्पित कर करिन नमन
रायपुर, मुख्यमंत्री श्री विष्णु देव साय ह आज राजधानी रायपुर स्थित जागृति मंडल, पंडरी पहुँचके छत्तीसगढ़ के पहिली प्रांत प्रचारक श्रद्धेय श्री शांताराम जी ल श्रद्धांजलि अर्पित करिन। मुख्यमंत्री श्री साय ह ऊंखर पार्थिव शरीर म पुष्पचक्र अर्पित करके ओ मन ल नमन करिन।
मुख्यमंत्री श्री साय ह कहिन के श्रद्धेय शांताराम जी संघ के वरिष्ठ प्रचारक रहिन अऊ उंखर मोर संग गहरा आत्मीय संबंध रहिस। ओ मन हमेसा अभिभावक के समान स्नेह अऊ मार्गदर्शन देत रहिन। उंखर निधन संघ परिवार, समाज अऊ प्रदेश बर ही नहीं, बल्कि मोर बर घलोक व्यक्तिगत क्षति हे। मुख्यमंत्री श्री साय ह ईश्वर ले प्रार्थना करत कहिन के दिवंगत आत्मा ल अपन श्रीचरण म जगा देवंय अऊ सबो शुभचिंतक मन ल ये गहन दुःख सहे के शक्ति देवंय।
पहिली मुख्यमंत्री डॉ. रमन सिंह ह श्रद्धेय शांताराम जी ल श्रद्धांजलि अर्पित करत कहिन के ओ मन हमार बर पिता तुल्य रहिन। उमन मदकूदीप ल पुनर्जीवित करके राष्ट्र निर्माण म महत्वपूर्ण योगदान दीन अऊ अपन विनम्रता अऊ जीवन मूल्य मन ले सबो के आदर्श बनिन। संघ के वरिष्ठ प्रचारक के रूप म उमन छत्तीसगढ़ के जनता अऊ स्वयंसेवक मन ल परिवार मानके सरलग मार्गदर्शन करिन। मुख्यमंत्री रहत घलोक मोला उंखर स्नेह अऊ आशीर्वाद मिलत रहिस। ऊंखर निधन ले पूरा प्रदेश शोकाकुल हे।
ए बेरा म कैबिनेट मंत्री श्री टंकराम वर्मा, श्री गजेंद्र यादव, गुरू खुशवंत साहेब, पहिली राज्यपाल श्री रमेश बैस, राज्यसभा सांसद श्री देवेंद्र प्रताप सिंह, राजनांदगांव सांसद श्री संतोष पांडे, विधायक सर्वश्री अनुज शर्मा अऊ मोतीलाल साहू, अल्पसंख्यक आयोग के अध्यक्ष श्री अमरजीत छाबड़ा, बाल संरक्षण आयोग के अध्यक्ष डॉ. वर्णिका शर्मा, कृषि कल्याण बोर्ड के अध्यक्ष श्री चंद्रहास चंद्राकर संग बड़ संख्या म स्वयंसेवक अऊ आमजनता उपस्थित रहिन।