पीएम सूर्यघर योजना ले आत्मनिर्भर बनिस श्रीमती सोनकुंवर, बिजली बिल होइस शून्य

मोहला-मानपुर-अम्बागढ़ चौकी, प्रधानमंत्री सूर्यघर मुफ्त बिजली योजना जिला के उपभोक्ता मन खातिर वरदान साबित होवत हे। ए योजना के माध्यम ले घर-घर सौर ऊर्जा ले अंजोर पहुँचत हे अऊ उपभोक्ता बिजली के मामला म आत्मनिर्भर बनत हें। मोहला-मानपुर-अम्बागढ़ चौकी जिला स्थित मेरेगांव के रहवइया श्रीमती सोनकुंवर ध्रुव ह योजना के लाभ उठात अपन मकान के छत म पाँच किलोवाट क्षमता के रूफ टॉप सोलर पैनल स्थापित करे हे। सौर ऊर्जा ले होवत उत्पादन ले ओखर पूरा घर रोशन होवत हे। एखर से ओ ल हर महीना अवइया भारी-भरकम बिजली बिल ले राहत मिले हे अऊ अब ओखर बिजली बिल शून्य हो गए हे। 
श्रीमती ध्रुव ह बताइस के वोखर बड़का संघरा परिवार म बिजली के खपत जादा रहिस, जेखर सेती हर महिना बिजली बिल के राशि घलोक जादा आत रहिस। प्रधानमंत्री सूर्यघर योजना के जानकारी मिले म वो ह तुरंते सोलर पैनल लगवाए के निर्णय लीस। लगभग 2 लाख 97 हजार रुपिया के लागत वाले ए संयंत्र म केंद्र सरकार कोति ले ओ मन ल 78 हजार रुपिया के सब्सिडी मिलिस। अब वो ह अपन घर के जरूरत पूरा करत हे, संगेच अकतहा बिजली के उत्पादन करके सप्लाई घलोक करत हे। श्रीमती ध्रुव ह बताइस के ए योजना ले ओ ल आर्थिक बचत होवत हे संगेच पर्यावरण संरक्षण म घलोक योगदान देहे के अवसर मिलत हे। वो ह प्रधानमंत्री श्री नरेंद्र मोदी अऊ मुख्यमंत्री श्री विष्णु देव साय के प्रति आभार व्यक्त करत आन उपभोक्ता मन ले घलोक अपील करे हे के ओ मन घलोक योजना के लाभ लेके बिजली खातिर आत्मनिर्भर बनंय।