प्रधानमंत्री सूर्यघर मुफ्त बिजली योजना ले सत्येंद्र के बिजली बिल के चिंता होइस दूर, पाछू 8 महीना ले बिल जीरो

उपभोक्ता मन खातिर किफायती अऊ उपयोगी साबित होवत योजना के अंतर्गत सोलर पैनल लगाय म उपभोक्ता मन ल सब्सिडी के मिलत हे दुहरी लाभ
रायपुर, प्रधानमंत्री सूर्यघर मुफ्त बिजली योजना उपभोक्ता मन खातिर उपयोगी अऊ मददगार साबित होवत हे। बोरियाखुर्द के रहवइया श्री सत्येंद्र चंद्राकर प्रधानमंत्री अऊ मुख्यमंत्री के प्रति आभार व्यक्त करत बताइस के जनवरी 2025 म वो ह अपन घर के छत म 4 किलोवाट क्षमता के सोलर पैनल स्थापित करिस। ए म करीब 2.20 लाख रूपिया के लागत आइस, जेमां शासन ले ओ ल 78 हजार रूपिया के अनुदान मिलीस। वो ह बताइस के पहिली हर महिना ओखर बिजली बिल 2500 ले 3500 रूपिया आवत रहिस। गर्मी के दिन म ये खरचा 4000 रूपिया ले जादा हो जात रहिस। संगे वो जब ले EV Car लेहे हे तब ले बिल अऊ जादा बढ़ गए रहिस। फेर सौर पैनल लगाय के बाद जनवरी 2025 ले अब तक ओखर बिजली बिल शून्य आवत हे। अतके न ही, अकतहा बिजली के उत्पादन होए म वो ग्रिड म घलोक जमा होवत हे।
श्री चंद्राकर ह कहिस के प्रधानमंत्री सूर्यघर मुफ्त बिजली योजना अड़बड़ उपयोगी हे। वो ह बताइस के अब छत्तीसगढ़ सरकार ह घलोक प्रधानमंत्री सूर्यघर मुफ्त बिजली योजना के अंतर्गत सोलर पैनल लगाय म 15 ले 30 हजार रूपिया तक के अकतहा अनुदान देहे के घोषणा करे हे, जेखर से उपभोक्ता मन ल अब दोहरा लाभ मिलही। वो ह आम नागरिक मन ले अपील करे हे के ओ मन ए योजना के लाभ लेके बिजली उपभोक्ता ले ऊर्जा-दाता बने के दिशा म कदम बढ़ावंय।
श्री चंद्राकर ह बताइस के समाचार पत्र के माध्यम ले मोला जानकारी मिलीस अऊ मै ह पीएम सूर्यघर के वेबसाइट ले ऑनलाइन फॉर्म भर देंव, जेन बेहद सरल रहिस ये मां मोला कोनो परेशानी नइ होइस। जल्दीच मोर छत म पैनल इंस्टॉल कर दे गीस। सिरिफ 10 ले 15 दिन म अनुदान के राशि मोला मिल गे। वो ह बताइस के ये पर्यावरण संरक्षण के दिशा म बने उदीम हे। मैं पर्यावरण ल संरक्षित करे म विश्वास करथं ते पाए के EV Car उपयोग करत हंव। कल पेट्रोल अऊ डीजल खतम हो जाही फेर सुरुज अपन रोशनी देना बंद नइ करय।