बीमारी ले हार मान गे रहिस परिजन, भरोसा बनिस एसीआई, 60 बछर के मरीज ल मिलीस नवा जीवन

रायपुर, पं. जवाहरलाल नेहरू चिकित्सा महाविद्यालय अऊ डॉ. भीमराव अम्बेडकर स्मृति चिकित्सालय स्थित एडवांस कार्डियक इंस्टीट्यूट (एसीआई) अब न केवल छत्तीसगढ़ बल्कि पड़ोसी राज्य मन के मरीज मन बर घलोक जीवनदाता बनत जात हे। हाले म एसीआई के कार्डियोलॉजी विभाग म मध्यप्रदेश के रहवइया 60 बछर के मरीज के हृदय के 100% ब्लॉक होए चार नस के सफल एंजियोप्लास्टी करे गीस।
मरीज के परिजन मन के मुताबिक, मरीज लंबा समय ले दवा के सहारे जीवन जीयत रहिस। मध्यप्रदेश के कई बड़े अस्पताल ह एंजियोप्लास्टी करे ले मना कर दे रहिस। एखर बीच वोखर एक करीबी रिश्तेदार ले पता चलिस के एसीआई म कुछ साल पहिली एक मरीज के जटिल हृदय रोग के सफल उपचार करे गए हे। इही भरोसा के संग ओ रायपुर पहुँचिस। खुद मरीज अपन अनुभव बतात कहिस के जब कई बड़े अस्पताल के डॉक्टर मन ह कहि दे रहिन के वोखर इहां इलाज संभव नइ हे त एसीआई बड़ भरोसा लेके आए रहिस। डॉक्टर ले हमने कह घलोक दे रहेन के जतना रिस्क होवय, आप मन इलाज़ के तैयारी करव, मैं ओखर बर मानसिक रूप ले पूरा तैयार हंव। आखिर इहां के डॉक्टर मन ह मोला नवा जीवनदान दीन।
कार्डियोलॉजी विभागाध्यक्ष डॉ. स्मित श्रीवास्तव के अगुवई म होए ए प्रक्रिया म राइट फीमोरल एंजियोप्लास्टी के संग मरीज के ब्लॉक नस मन ल खोले गीस। फिलहाल मरीज पूरा स्वस्थ हे अऊ जल्दीच ओ ल डिस्चार्ज कर दे जाही।
डॉ. श्रीवास्तव ह बताइस के पाँच साल पहिली घलोक मध्यप्रदेश ले आए एक मरीज के सफल लेजर एंजियोप्लास्टी करे गए रहिस। ए पइत घलोक कठोर ब्लॉकेज ल देखत लेजर के तैयारी करे गए रहिस, फेर सौभाग्य ले सामान्य एंजियोप्लास्टी ले ही सफल परिणाम मिल गे। डीन डॉ. विवेक चौधरी ह मरीज के स्थिति ल देखत विभाग ल लउहे एंजियोप्लास्टी करे के निर्देश दीस।