प्रधानमंत्री सूर्यघर योजना: उपभोक्ता मन ल सौर ऊर्जा ले मिलत हे राहत

घर के छत म बनत बिजली ले कोनी रहवइया श्री सागर चौधरी के बिल होइस आधा
बिलासपुर, केन्द्र सरकार के प्रधानमंत्री सूर्यघर योजना अब उपभोक्ता मन के जिंदगी म बड़का बदलाव लावत हे। योजना के लाभ उठाके कृष्णा विहार कोनी रहवइया श्री सागर चौधरी ह अपन घर के छत म 6 किलोवाट के सोलर पैनल लगवाए हे। एखर बाद ओखर बिजली बिल आधा ले घलोक कम हो गए हे।ए अभिनव योजना खातिर वो ह प्रधानमंत्री, मुख्यमंत्री के आभार जताए हें।
कृष्णा विहार कोनी म रहइया श्री सागर चौधरी ह बताइस के वोखर घर म बिजली के खपत अड़बड़ रहिस हर महिना अवइया बिजली के बिल ले ओ ल बड़का आर्थिक भार झेलना परत रहिस। सूर्यघर योजना के बारे म जानकारी मिले म वो ह 6 किलोवाट के सोलर पैनल लगवाइस जेकर लागत करीब तीन लाख 50 हजार रुपिया रहिस। ए प्लांट म ओ ल केन्द्र सरकार ले 78 हजार रूपिया के सब्सिडी के संग राज्य सरकार ले मिलइया 30 हजार रूपिया के सब्सिडी घलोक मिलीस। जबसे वोखर घर म सोलर पैनल लगे हे, परिवार ल बिजली बिल के चिंता ले मुक्ति मिल गए हे।
जानबा हे के पीएम सूर्यघर योजना म एक पइत निवेश करे म 25 बछर तक बिजली आपूर्ति ठउका होथे अऊ ए म कोनो विशेष मेंटेनेंस खर्च घलोक नइ हे। संगेच अकतहा बिजली ल ग्रिड म सप्लाई करके आय अर्जित करे के अवसर घलोक मिलथे। ये योजना  पर्यावरण संरक्षण अऊ ऊर्जा आत्मनिर्भरता के दिशा म एक बड़का कदम हे। योजना के तहत सोलर पैनल लगवाए म केन्द्र सरकार ले 78 हजार रूपिया तक सब्सिडी अऊ राज्य सरकार से 30 हजार रूपिया तक सब्सिडी देहे जात हे। संगेच सरकार 300 यूनिट हर महिना मुफ्त बिजली देवत हे। योजना के तहत करजा के घलोक प्रावधान हे जेमां एक पइत निवेश म 25 बछर तक मुफ्त अऊ सरलग बिजली पाय जा सकत हे।