अंतर्राष्ट्रीय सियान दिवस म रायपुर म राज्य स्तरीय आयोजन
सियान मन के विशेष देखभाल खातिर राज्य म सियान गुड़ी
रायपुर, बिलासपुर कोरबा अऊ दुर्ग म पीपीपी मॉडल म बनही सर्वसुविधायुक्त वृद्धाश्रम
पुनर्वास उपकरण मन के रिपेयरिंग खातिर रायपुर म शुरू होही सर्विस सेंटर
रायपुर, मुख्यमंत्री श्री विष्णु देव साय ह कहिन के सियान हमार मार्गदर्शक अऊ अमूल्य संस्कृति के वाहक हें। सियान मन के देखभाल सरकार अऊ समाज दुनों के संघरा जिम्मेदारी हे। केंद्र अऊ राज्य सरकार वरिष्ठ नागरिक मन के पेंशन, स्वास्थ्य, सामाजिक सुरक्षा अऊ सम्मानपूर्ण जीवन खातिर समर्पित योजना मन ल सरलग मजबूत बनावत हे। मुख्यमंत्री आज राजधानी रायपुर के इंदिरा गांधी कृषि विश्वविद्यालय परिसर म स्थित कृषि मंडपम म अंतर्राष्ट्रीय सियान दिवस के राज्य स्तरीय आयोजन ल मुख्य अतिथि के रूप म संबोधित करत रहिन।
मुख्यमंत्री ह कार्यक्रम म सियान मन ल शॉल अऊ श्रीफल भेंट करके सम्मानित करिन। ए मौका म उमन सियान मन के विशेष देखभाल खातिर राज्य म सियान गुड़ी, प्रदेश के चार बड़े शहर रायपुर, बिलासपुर कोरबा अऊ दुर्ग म पीपीपी मॉडल म सर्वसुविधायुक्त वृद्धाश्रम बनाए अऊ दिव्यांगजन मन के सहायक उपकरण के रिपेयरिंग खातिर राजधानी रायपुर म सर्विस सेंटर बनाए के घोषणा करिन। श्री साय ह नशामुक्त भारत अभियान के अंतर्गत राज्यभर म जागरूकता बर 25 नशामुक्ति रथ ल हरी झंडी देखाके रवाना करिन। कार्यक्रम म छत्तीसगढ़ी लोकगीत अऊ नृत्य प्रस्तुति देहे गीस अऊ स्वास्थ्य जांच शिविर के घलोक आयोजन करे गीस।
मुख्यमंत्री श्री साय ह कहिन के सियान दिवस हमला अपन दायित्व ल सुरता देवाए के अवसर ये। मोर गुस् ह मोला सिखाए हे के माता-पिता के सेवा ही ईश्वर के पूजा हे। मैं ह अपन गुरू के संस्कार अऊ आदर्श के हमेशा पालन करे हंव। श्री साय ह कहिन के हम सबो ल ये सत नइ भूलना चाही के आज हमार सियान जेन अवस्था म हे, काली हम सबो उही अवस्था म होबोन। मुख्यमंत्री श्री साय अऊ अतिथि मन ह जनता ले अपील करिन के ओ मन सियान मन के सम्मान करंय अऊ ओ मन ल सरकार के योजना मन के लाभ देवाए म सहयोग करंय, ताकि उंखर जीवन अऊ जादा सुरक्षित, सम्मानजनक अऊ खुशहाल बन सकय।
मुख्यमंत्री ह कहिन के प्रदेश म सियान मन खातिर संचालित पेंशन योजना मन म 14 लाख सियान लाभान्वित होवत हें। आयुष्मान भारत अऊ शहीद वीर नारायण सिंह स्वास्थ्य सहायता योजना के तहत अब तक 8 लाख ले जादा सियान मन ल निःशुल्क चिकित्सा सुविधा देहे गए हे। मुख्यमंत्री तीर्थयात्रा योजना अऊ श्री रामलला दर्शन योजना ले 50 हजार ले जादा सियान मन लाभान्वित होए हें। समाज कल्याण मंत्री श्रीमती लक्ष्मी राजवाड़े ह कहिन के प्रदेश के 35 वृद्धाश्रम मन म 1049 वरिष्ठ नागरिक मन के देखभाल करे जात हे अऊ 6 जिला मन म देखरेख गृह संचालित हे। विभागीय हेल्पलाइन के माध्यम ले अब तक 54 हजार ले जादा वरिष्ठजन मन के समस्या मन के समाधान करे गए हे।
ए बेरा म मंत्री श्री टंकराम वर्मा, सांसद श्री बृजमोहन अग्रवाल, विधायक श्री राजेश मूणत, श्री मोतीलाल साहू, श्री इन्द्र कुमार साहू, श्री अनुज शर्मा, छत्तीसगढ़ निःशक्तजन वित्त विकास निगम अध्यक्ष श्री लोकेश कावड़िया संग बहुत अकन जनप्रतिनिधि, गणमान्य नागरिक अऊ वरिष्ठ प्रशासनिक अधिकारी उपस्थित रहिन।
