मुख्यमंत्री श्री साय ले इसरो के वैज्ञानिक मन ह करिन सौजन्य भेंट
इसरो के यात्रा म छत्तीसगढ़ के भागीदारी, युवा मन खातिर नवा अवसर अऊ शासन के कार्यकुशलता बढ़ाय म इसरो के तकनीक के उपयोग उपर होइस परखर गोठ-बात
रायपुर, मुख्यमंत्री श्री विष्णु देव साय ले राजधानी रायपुर स्थित मुख्यमंत्री निवास कार्यालय म इसरो अहमदाबाद केंद्र के निदेशक डॉ. एन. एम. देसाई के अगुवई म अंतरिक्ष वैज्ञानिक मन के एक प्रतिनिधिमंडल ह सौजन्य भेंट करिस।
बैठक के समय मुख्यमंत्री श्री साय अऊ वैज्ञानिक मन के बीच इसरो के यात्रा म छत्तीसगढ़ के भागीदारी ल बढ़ाय, राज्य के युवा मन खातिर नवा अवसर सृजित करे, शासन के कामकाज म पारदर्शिता अऊ दक्षता लाय खातिर इसरो के तकनीक के उपयोग अऊ स्कूल–कॉलेज के पढ़ईया लईका मन खातिर इसरो कोति ले संचालित गतिविधि मन म विस्तारपूर्वक चर्चा होइस।
मुख्यमंत्री श्री साय ह इसरो के उपलब्धि मन के सराहना करत कहिन के भारत ह अंतरिक्ष विज्ञान के क्षेत्र म जेन ऊँचाइ पाए हे, वो हरेक भारतीय खातिर गरब के विसय हे। उमन कहिन के छत्तीसगढ़ सरकार नवाचार अऊ तकनीकी शिक्षा ल प्रोत्साहित करत हे, ताकि प्रदेश के युवा स्पेस साइंस के प्रति रुचि लेके देश के अंतरिक्ष अभियान मन म सक्रिय भागीदारी निभा सकंय।
मुख्यमंत्री श्री साय ह कहिन के इसरो से प्रदेश के पढ़ईया लईका मन खातिर इंटर्नशिप अऊ प्रशिक्षण कार्यक्रम आयोजित करे जाव, जेखर से ओ मन ल अंतरिक्ष विज्ञान के व्यावहारिक जानकारी प्राप्त हो सके। उमन ये वाले घलोक कहिन के इसरो के तकनीक के उपयोग कृषि, खनन नियंत्रण, भू-अतिक्रमण के निगरानी अऊ धान खरीदी के समय अवैध गतिविधि मन के पहिचान जइसे काम मन म प्रभावी रूप ले करे जा सकत हे।
ए बेरा म इसरो अहमदाबाद केंद्र के निदेशक डॉ. एन. एम. देसाई ह मुख्यमंत्री ल इसरो कोति ले संचालित कई ठन परियोजना मन के जानकारी दीन। उमन बताइन के युवा मन ल अंतरिक्ष विज्ञान ले जोड़े खातिर इसरो कई अभिनव कार्यक्रम चलावत हे, जे मन ल छत्तीसगढ़ म घलोक विस्तारित करे जाही। ए बेरा म प्रदेश म एक ‘स्पेस गैलरी’ के स्थापना ल लेके घलोक सकारात्मक चर्चा होइस।
डॉ. देसाई ह मुख्यमंत्री श्री साय ल इसरो अहमदाबाद केंद्र के भ्रमण बर आमंत्रित करिन अऊ ओ मन ल इसरो कोति ले हाले म लॉन्च करे उपग्रह अऊ मिशन चंद्रयान के प्रतिकृति स्मृति स्वरूप भेंट करिन।
इसरो के वैज्ञानिक भगवान मधेश्वर के फोटू देखके होइन अभिभूत
मुख्यमंत्री निवास म आयोजित बैठक के समय इसरो के वैज्ञानिक मन के नजर जब भगवान मधेश्वर के फोटू उपर परिस, त ओ मन ओला देखके अभिभूत हो गें। जिज्ञासावश उमन मुख्यमंत्री श्री विष्णु देव साय ले एखर बारे म जानकारी प्राप्त करिन।
मुख्यमंत्री ह बताइन के मधेश्वर पहाड़ जशपुर जिला म स्थित हे, जेमां भगवान शिव विशाल प्राकृतिक शिवलिंग स्वरूप म पूजे जाथे। स्थानीय मनखे भगवान शिव के ए स्वरूप के बहुत श्रद्धा अऊ भक्ति के संग पूजा-अर्चना करथें। उमन कहिन के ये जगा धार्मिक आस्था के केंद्र हे, संगेच छत्तीसगढ़ के समृद्ध प्राकृतिक अऊ सांस्कृतिक विरासत के चिनहारी घलोक हे। मुख्यमंत्री श्री साय ह सबो वैज्ञानिक मन ल भगवान मधेश्वर के छायाचित्र भेंटस्वरूप दीन।
एबेरा म मुख्यमंत्री के प्रमुख सचिव श्री सुबोध कुमार सिंह, मुख्यमंत्री के सचिव श्री राहुल भगत, राजस्व विभाग के सचिव श्रीमती रीना बाबा साहब कंगाले, उच्च शिक्षा विभाग के सचिव डॉ. एस. भारतीदासन, संचालक रोजगार अऊ प्रशिक्षण श्री विजय दयाराम के., संचालक भू-अभिलेख श्री विनीत नंदनवार, इसरो के ग्रुप डायरेक्टर डॉ. डी. के. पटेल, डॉ. दीपक कुमार सिंह, कलेक्टर श्री गौरव कुमार सिंह संग आन अधिकारीगण उपस्थित रहिन।
