पीएम सूर्यघर मुफ्त बिजली योजना ले घर म उजाला अऊ मन म खुशहाली

बलौदाबाजार, प्रधानमंत्री सूर्यघर मुफ्त बिजली योजना ह बलौदाबाजार जिला के नागरिक मन के जीवन म नवा रोशनी भर देहे हे। ए योजना ले हितग्राही के घर सुरुज ऊर्जा ले रोशन होए के संग ऊंखर जीवन म खुशहाली घलोक आवत हे।
पंचशील नगर के रहवइया सुबोध वर्मा ह अपन घर म ए योजना के अंतर्गत सोलर सिसटम लगवाके बिजली बिल ले राहत पाय हे, संगेच स्वच्छ ऊर्जा के उपयोग ले पर्यावरण संरक्षण म घलोक योगदान देवत हें। श्री वर्मा ह बताइस के ओ मन ल योजना के जानकारी इंस्टाग्राम के माध्यम ले मिले रहिस। वो ह बताइस के पहिली हर महीना बिजली बिल के चिंता बने रहय, फेर जुलाई म सोलर सिसटम लगे के बाद ले ये चिंता खतम हो गए हे। अब घर के हर कोना अंजोर ले भरे हे अऊ बचत घलोक होवत हे। प्रधानमंत्री सूर्यघर मुफ्त बिजली योजना के तहत केंद्र अऊ राज्य सरकार कोति ले देहे जात सब्सिडी अऊ आसान प्रक्रिया ले आम नागरिक मन म उत्साह बाढ़े हे। जिला म बड़ संख्या म मनखे ए योजना ले जुड़के ऊर्जा आत्मनिर्भरता के दिशा म कदम बढ़ावत हे।