मुंगेली, प्रदेश सरकार के फ्लैगशिप महतारी वंदन योजना महिला मन के जीवन म बदलाव के नवा इबारत लिखत हे। ए योजना ह प्रदेश के कई महिला मन ल न सिरिफ आर्थिक सहयोग देवत हे, भलुक ओ मन ल आत्मनिर्भर बने के प्रेरणा घलोक देहे हे। अइसनहे एक प्रेरणास्पद कहानी हे, मुंगेली विकासखण्ड के ग्राम बांकी के रानी श्रीवास के, जे ह ए योजना के सहायता ले अपन बर एक नवा पहिचान गढ़े हे। रानी श्रीवास एक सामान्य ग्रामीण महिला हे, जेन सात सदस्यीय संघरा परिवार के हिस्सा हे। कठिन आर्थिक परिस्थिति मन के बावजूद वो ह हार नइ माने हे अऊ महतारी वंदन योजना ले मिले राशि ल एक अवसर म बदले हे। वो ह योजना ले मिले पइसा ले 26 हजार रूपिया के लैपटॉप बिसाए हे, जेकर किश्त ओ इही योजना के सहायता ले चुकावत हे।
रानी श्रीवास ह श्री बुक स्टेशनरी एंड फोटोकॉपी सेंटर नाव ले एक छोट कन व्यवसाय शुरू करे हे, जेमां ओ गांव वाले मन ल सरकारी अउ निजी फॉर्म भरे, कागद मन के फोटोकॉपी, स्टेशनरी के बिक्री के संग लोकसेवा पोर्टल, स्कॉलरशिप आदि सुविधा गॉव म ही उपलब्ध करावत हे। अतकेच भर न ही, रानी श्रीवास सिलाई काम म घलोक दक्ष हे अऊ एकर लाभ उठाके हर एक महिना 06 हजार रूपिया ले 08 हजार रूपिया के आय अर्जित करत हे। वोखर ये आय वोखर लइका मन के शिक्षा, परिवार के जरूरत अऊ भविष्य के योजना मन ल गति देवत हे। वोखर कहानी ये संदेश देथे के जब महिला मन सशक्त होथे, त पूरा परिवार अऊ समाज सशक्त होथे। रानी श्रीवास के कहानी ये स्पष्ट करथे, के कहूं सरकारी योजना मन सही हाथ तक पहुँचय अऊ ओखर सदुपयोग करे जाए, त ओ मन जिंदगी बदल सकत हें।
महतारी वंदन योजना: लैपटॉप ले लेके लोकसेवा केन्द्र तक, रानी श्रीवास ह देखाइस आत्मनिर्भरता के रद्दा
