रायगढ़ म करेंट लगा के हाथी ल मरवइया तीन आरोपी पकड़ाइन

वन विभाग के चेत ले पकड़े गीस तीन आरोपी, मरे हाथी के मामला सुलझिस
रायगढ़, वनमंत्री श्री केदार कश्यप के हुकुम के मुताबिक वन विभाग ह लउहे रायगढ़ वनमंडल के अंतर्गत ग्राम केराखोल म एक मृत हाथी के मामला सुलझा लेहे हे। सूचना मिलतेच वनमंडलाधिकारी रायगढ़ के अगुवई म वन अमला तुरंत मौका म पहुँचिस अऊ घटना स्थल के निरीक्षण करे म प्राथमिक जांच म ये स्पष्ट होइस के हाथी के मृत्यु बिजली के तार के चपेट म आए ले होए हे। स्थल म जांच के समय तार, सूखा पत्ता, माटी के निशान अऊ संदिग्ध जिनिस मिलीस। संगे मृत हाथी के पेट म घाव के निशान, जेमां लगे स्नेयर ल घलोक जब्त करे गीस। जानबा हे के वन मंत्री श्री केदार कश्यप ह वन्य अपराध म लिप्त मनखे मन उपर सख्त कार्रवाई करे के निर्देश अधिकारी मन ल देहे हें।
वन विभाग के तीन सदस्यीय पशुचिकित्सा टीम ह मृत हाथी के पोस्टमार्टम करिस। प्रारंभिक रिपोट म मृत्यु के कारन विद्युत करंट बताए गीस। घटना के बाद पुलिस विभाग ल सूचित करे गीस अऊ तुरंत जांच शुरू करे गीस। संदिग्ध मनखे मन ले पूछताछ के समय तीन आरोपी मन के पहिचान होइस, जेमां वीर सिंग मांझी पिता मेहत्तर मांझी आयु 28 साल, ग्राम केराखोल, रामनाथ राठिया पिता महेश्वर राठिया आयु 42 साल, ग्राम औराईमुड़ा अऊ बसंत राठिया पिता ठाकुर राम राठिया आयु 40 साल, ग्राम केराखोल सामिल हे। पूछताछ म आरोपी वीर सिंग मांझी ह स्वीकार करिस के ओ हर अपन संगी मन के संग मिलके खेत के रखवाली खातिर बिजली के तार लगाके जंगली जानवर मन ल मारे के प्रयास करे रहिस। उहर म हाथी करंट के चपेट म आ गे। आरोपी मन ह तार अऊ लोहा के सामान खुद बिसाए रहिन।
वन अपराध म लिप्त तीनों आरोपी मन ल वन अपराध के तहत गिरफ्तार करे गए हे। उंकर विरुद्ध वन्यजीव संरक्षण अधिनियम, 1972 के धारा 9 अऊ 51 के अंतर्गत 20 अकटूबर के अपराध दर्ज करके 21 अकटूबर के तीनों आरोपी मन ल न्यायिक अभिरक्षा म जेल भेज दे गए हे अउ मामला के विस्तृत जांच जारी हे।