किसान मन ल किसान मेंला म फसल विविधीकरण अऊ जैविक खेती के मार्गदर्शन मिलीस

राष्ट्रीय कृषि विकास योजना अंतर्गत किसान मन ल ग्राफ्टेड टमाटर पौधा बांटे गीस
जनप्रतिनिधि मन ह जैविक खेती अपनाए बर किसान मन ल करिन प्रेरित
अम्बिकापुर, जिला स्तरीय किसान मेला कृषि विभाग, उद्यानिकी विभाग, पशुधन विकास विभाग अऊ मत्स्य पालन विभाग कोति ले कई ठन योजना अऊ नवा तकनीक मन के जानकारी बर स्टॉल लगाए गीस, जेमा जनप्रतिनिधि मन संग बड़ संख्या म किसान मन ह अवलोकन करिन। ये आयोजन कृषि विज्ञान केन्द्र अजिरम, अम्बिकापुर म करे गीस। कृषि वैज्ञानिक मन ह मेला म फसल विविधीकरण के महत्व उपर चर्चा करत बताइन के पारंपरिक धान के खेती के तुलना म गन्ना, सब्जी अऊ उद्यानिकी फसल मन ले किसान मन ल जादा लाभ प्राप्त हो सकत हे। वैज्ञानिक म ह बताइन के जिहां धान के खेती म एक रुपिया के लागत म लगभग 50 पइसा के लाभ मिलथे, उहें गन्ना के खेती म एक रुपिया के लागत म 75 पइसा के लाभ प्राप्त होथे। उहें शासन कोति ले संचालित किसान हितैषी योजना मन के जानकारी देहे गीस।
कार्यक्रम म राष्ट्रीय कृषि विकास योजना अंतर्गत 5 किसान मन ल टमाटर के ग्राफ्टेड पौधा, 5 किसान मन ल सरसों बीज मिनीकिट, 5 किसान मन ल स्वॉयल हेल्थ कार्ड अऊ बीमा पॉलिसी प्रमाणपत्र देहे गीस। मत्स्य पालन विभाग कोति ले प्रधानमंत्री मत्स्य संपदा योजना के तहत 7 लाभार्थि मन ल आईस बॉक्स अऊ मछली पकड़े के जाल बांटे गीस। संगेच जनप्रतिनिधि मन ह पुस्तक के विमोचन करिन।
पर्यटन, संस्कृति, धार्मिक न्यास अऊ धर्मस्व मंत्री श्री राजेश अग्रवाल ह कहिन के प्रधानमंत्री श्री नरेन्द्र मोदी अऊ मुख्यमंत्री श्री विष्णु देव साय के अगुवई म किसान मन के उत्थान खातिर बहुत अकन योजना संचालित करे जात हे। उमन कहिन के किसान सम्मान निधि के राशि अब सीधा ग्राम पंचायत स्तर म उपलब्ध कराए जाही, जेखर से किसान मन ल बैंक के चक्कर नइ लगाय ल परय। उमन जैविक खेती ल बढ़ावा देहे, रासायनिक खाद मन के जादा परयोग ले बचे अऊ मृदा के पोषकता बनाए रखे खातिर किसान मन ले आग्रह करिन। उमन कहिन के पशुधन विकास विभाग के माध्यम ले कृत्रिम गर्भाधान कार्यक्रम ल गति देहे जात हे, जेखर से 90 प्रतिशत बछिया प्राप्त होए के संभावना बाढ़े हे। उमन मत्स्य पालन विभाग के योजना मन के लाभ उठाए खातिर घलोक किसान मन ल प्रेरित करिन।