मनेंद्रगढ़ सिविल अस्पताल म सरलग बाढ़त हे स्वास्थ्य सुविधा

तीन महिना म 1827 मरीज मन ल मिलीस उपचार मातृ अऊ शिशु स्वास्थ्य सेवा म मिलीस सफलता
मनेंद्रगढ़, स्वास्थ्य मंत्री अऊ स्थानीय विधायक श्री श्याम बिहारी जायसवाल के सरलग उदीम ले मनेंद्रगढ़ सिविल अस्पताल ह जुलाई ले सितंबर 2025 के अवधि म स्वास्थ्य सेवा के क्षेत्र म उल्लेखनीय प्रगति दर्ज करे हे। अस्पताल के त्रैमासिक रिपोट के मुताबिक ए अवधि म कुल 1827 मरीज मन ल उपचार अऊ देखभाल के सुविधा देहे गए हे। ये उपलब्धि जिला म स्वास्थ्य सेवा के सतत सुदृढ़ीकरण अऊ आमजनता म बाढ़त भरोसा ल बताथे।
अस्पताल म मातृ अऊ शिशु स्वास्थ्य सेवा ले संबंधित मामला मन के संख्या सबले जादा रहे हे। ए बेरा म 596 गर्भवती महिला मन के प्रसव पूर्व जांच (ANC अऊ 375 प्रसवोत्तर माता मन के देखभाल (PNC) करे गीस। ये आंकड़ा दर्शाथे के मातृ अऊ शिशु स्वास्थ्य के प्रति जनजागरूकता सरलग बाढ़त हे। 

सामान्य बीमारी मन के संगे-संग आपातकालीन स्थिति मनम घलोक अस्पताल के चिकित्सा टीम ह जल्दी अऊ प्रभावी सेवा देहे हे। एनीमिया के 150 , बुखार के 201, सड़क दुर्घटना (RTA) के 40, सर्पदंश के 53, भालू हमला के 5, विषाक्तता के 9 अऊ जले के 6 मरीज मन के सफलतापूर्वक उपचार करे गीस। एखर अलावा 80 सिजेरियन ऑपरेशन (LSCS) घलोक सफलतापूर्वक संपन्न होइस।
अस्पताल प्रशासन के मुताबिक अब रेफर करइया मरीज मन के संख्या म उल्लेखनीय कमी आए हे, जेन स्थानीय स्तर म बेहतर चिकित्सा सुविधा के उपलब्धता के सकारात्मक संकेत हे। ये सफलता अस्पताल के डॉक्टर, नर्सिंग स्टाफ अऊ स्वास्थ्यकर्मी मन के टीम भावना, समर्पण अऊ जनसेवा के प्रति निष्ठा के परिणाम हे। अस्पताल प्रशासन ह बताइस के अवइया महीना म मरीज मन के सुविधा खातिर नवा चिकित्सा सेवा अऊ आधुनिक उपकरण जोड़े जाही, जेखर से क्षेत्र के नागरिक मन ल अऊ बेहतर उपचार उपलब्ध कराए जा सकही।