किसान मन के खुशहाली खातिर प्रदेश सरकार बाना उंचाए हे: मंत्री श्रीमती राजवाड़े

लांजित, रैसरा अऊ सम्बलपुर  म जलाशय जीर्णोद्धार काम मन के करिन भूमिपूजन
सूरजपुर, महिला अऊ बाल विकास मंत्री श्रीमती लक्ष्मी राजवाड़े ह आज सूरजपुर जिला के ग्राम लांजित, रैसरा अऊ सम्बलपुर (सेमरा) म आयोजित जलाशय जीर्णोद्धार काम मन के भूमिपूजन कार्यक्रम मन म मुख्य अतिथि के रूप म सामिल होके विकास काम मन के शुरुआत करिन।
लांजित म आयोजित मुख्य कार्यक्रम म मंत्री श्रीमती राजवाड़े ह कहिन के प्रदेश सरकार किसान मन के खुशहाली अऊ सिंचाई संसाधन मन के विस्तार खातिर सरलग काम करत हे। जलाशय मन के जीर्णोद्धार ले किसान मन के स्थायी जल उपलब्धता ठउका होही, जेखर से कृषि उत्पादन ल नवा दिशा अऊ गति मिलही।
उमन कहिन के मुख्यमंत्री श्री विष्णुदेव साय के अगुवई म प्रदेश सरकार ग्रामीण अंचल के सर्वांगीण विकास खातिर कृतसंकल्प हे। किसान मन के आय म बढ़ोतरी अऊ सिंचाई सुविधा के विस्तार सरकार के प्राथमिकता हे।
सन् 1986 म बने लांजित जलाशय लगभग 39 साल जुन्ना हे, जेन लंबा समय ले क्षेत्र के किसान मन ल खरीफ फसल खातिर सिंचाई सुविधा देवत हे। बांध के कुल लंबाई 435 मीटर अऊ जल भराव क्षमता 24.95 मिलियन क्यूबिक फीट हे। ए जलाशय ले दू नहर निकलथे — डेरी नहर 1650 मीटर अऊ जेवनी नहर 3390 मीटर लंबा हे। जीर्णोद्धार काम पूरा होए म जलाशय अपन रूपांकित सिंचाई क्षमता 240 हेक्टेयर प्राप्त करही, जेखर से जादा किसान मन ल लाभ मिलही। प्रदेश सरकार कोति ले ए जलाशय के जीर्णोद्धार अऊ मरम्मत काम बर 258.55 लाख रूपिया के स्वीकृति देहे गए हे।
कार्यक्रम म स्थानीय जनप्रतिनिधि, पंचायत पदाधिकारी, जल संसाधन विभाग संग आन विभाग मन के अधिकारी-कर्मचारी अऊ बड़ संख्या म ग्रामीणजन उपस्थित रहिन।
मंत्री श्रीमती राजवाड़े ह भैयाथान म जीवनदीप समिति के बैठक म घलोक सहभागिता करिन अऊ स्वास्थ्य सेवा के गुणवत्ता सुधार उपर चर्चा करिन।