जांजगीर ले 187 श्रद्धालु अयोध्या धाम के बर रवाना, मिलही निःशुल्क यात्रा अऊ दर्शन सुविधा

जांजगीर, राज्य शासन के ‘श्री रामलला अयोध्या धाम दर्शन योजना’ के तहत जांजगीर-चांपा जिला के श्रद्धालु मन के दल अयोध्या बर रवाना होइस। ए योजना के माध्यम ले श्रद्धालु मन ल निःशुल्क यात्रा, आवास, भोजन अऊ सुरक्षा के पूरा सुविधा देहे जात हे। जिला के 187 श्रद्धालु खोखरा ले बस से बिलासपुर स्टेशन तक पहुंचिन, जिहां ले ओ मन विशेष ट्रेन ले अयोध्या धाम जाही।
रवानगी समारोह म नगर पालिका अध्यक्ष रेखा देवा गढ़ेवाल, जिला पंचायत सदस्य उमा राठौर, आशा साव, उपाध्यक्ष मोहन यादव संग जनप्रतिनिधि मनह श्रद्धालु मन ल हरी झंडी देखाके रवाना करिन। उपस्थित जन ह यात्री मन ल तिलक लगाके अऊ फूलमाला पहिरा के स्वागत करिन। कार्यक्रम म उप संचालक पंचायत अभिमन्यु साहू संग अधिकारी-कर्मचारी घलोक मौजूद रहिन। श्रद्धालु मन म उछाह के माहौल रहिस अऊ उमन शासन के ए धार्मिक अउ जनकल्याणकारी पहल खातिर आभार व्यक्त करिन।