बीजापुर, जिला के 18 मजदूर मन ल प्रशासन ह दलाल के चंगुल ले सकुशल मुक्त कराइस। ग्राम कड़ेनार के 11 अऊ घुमरा के 7 मजदूर मन ल दलाल सीनू श्रीनिवास अगस्त महिना म जादा मजदूरी के लालच देके तेलंगाना ले गए रहिस। उहां ले ओ मन ल महाराष्ट्र अऊ फेर कर्नाटक के बागलकोट जिला म एक साहूकार तीर काम म लगा देहे गीस। मजदूर मन ल मेहनताना नइ दे गीस अऊ दलाल फरार हो गे। जानकारी मिलतेच बीजापुर कलेक्टर अऊ पुलिस अधीक्षक ह तुरंत कार्रवाई करत श्रम, राजस्व अऊ पुलिस विभाग के संघरा रेस्क्यू टीम बनाइस। टीम ह कर्नाटक जाके सबो मजदूर मन ल सुरक्षित छोड़ाइस अऊ ₹ 1,36,100 के बकाया मजदूरी घलोक देवाईस। 28 अकटूबर के मजदूर मन ल बीजापुर लाए गीस अऊ अगले दिन ओ मन ल ऊंखर गांव म सुरक्षित पहुंचा देहे गीस। ये लउहे कार्रवाई प्रशासन के संवेदनशीलता अऊ प्रभावी कार्यशैली के मिसाल बने हे।
बीजापुर प्रशासन के बड़का सफलता: दलाल के चंगुल ले 18 मजदूर सुरक्षित घर लहुटिन
