रायपुर, राज्य शासन कोति ले पेंशनर मन के सुविधा खातिर नवंबर महिना म डिजिटल जीवन प्रमाणपत्र (Digital Life Certificate-DLC) जमा करे बर विशेष अभियान चालू करे हे। ए अभियान के अंतर्गत पेंशनर मन ल अब जीवन प्रमाणपत्र जमा करे खातिर अपन असली बैंक शाखा म जाय के जरूरत नइ होही। ओ मन कोनो बैंक म जाके या घर बइठे “Jeevan Pramaan” मोबाइल ऐप अऊ वेबसाइट https://jeevanpramaan.gov.in के माध्यम ले डिजिटल जीवन प्रमाणपत्र जमा कर सकत हें।
भारत सरकार के कार्मिक, लोक शिकायत अऊ पेंशन मंत्रालय, पेंशन अऊ पेंशनभोगी कल्याण विभाग, नवा दिल्ली अऊ संचालनालय, पेंशन अऊ भविष्य निधि, छत्तीसगढ़ के हुकुम के मुताबिक ये सुविधा राज्य के सबो पेंशनर मन खातिर उपलब्ध कराए गए हे।
संचालक, पेंशन अऊ भविष्य निधि, छत्तीसगढ़, रायपुर, श्रीमती पद्मिनी भोई साहू ह सबो बैंक अऊ जिला कोषालय मन ल जरूरी हुकुम जारी करे हें। उमन बैंक अधिकारी मन के संग आयोजित बैठक म हुकुम दीन के नवंबर महिना म पेंशन बांटे के तारीक ले पहिली जादा ले जादा संख्या म पेंशनर मन के डिजिटल जीवन प्रमाणपत्र प्राप्त कीव, ताकि कोनो पेंशनर के पेंशन बाधित झन होवय।
ए निर्देश मन के पालन म भारतीय स्टेट बैंक संग आन बैंक मन कोति ले “डिजिटल जीवन प्रमाणपत्र मिशन 4.0” (Digital Life Certificate Mission 4.0) के अंतर्गत कई ठन शहर मन म विशेष कैम्प आयोजित करे जात हे। ए कैम्प मन म फेस ऑथेंटिकेशन तकनीक के माध्यम ले पेंशनर मन ले डिजिटल जीवन प्रमाणपत्र प्राप्त करे जाही।
भारत सरकार के गाइडलाइन के मुताबिक अब सबो बैंक अपन शाखा मनम अवइया हर एक पेंशनर के डिजिटल जीवन प्रमाणपत्र जनरेट करे खातिर उत्तरदायी होही, चाहे पेंशनर के खाता कोनो बैंक या शाखा म हो।
सबो पेंशनर म ले अपील करे गए हे के ओ मन ए सुविधा के लाभ उठाके समय म अपन जीवन प्रमाणपत्र (Life Certificate) प्रस्तुत करंय, ताकि उंखर पेंशन निर्बाध रूप ले जारी रह सकय।
नवंबर म डिजिटल जीवन प्रमाणपत्र खातिर विशेष अभियान: अब पेंशनर कोनो बैंक म जमा कर सकही DLC
