संविधान म आस्था रखके आगू बढ़त हे विश्व के सबले बड़का लोकतंत्र भारत : मुख्यमंत्री श्री साय

मुख्यमंत्री श्री विष्णु देव साय संविधान दिवस के अवसर म आयोजित “हमारा संविधान, हमर स्वाभिमान” कार्यक्रम म होइन शामिल
संविधान के प्रस्तावना के करे गीस सामूहिक वाचन
रायपुर, मुख्यमंत्री श्री विष्णु देव साय आज 75वां संविधान दिवस के अवसर म राजधानी रायपुर स्थित टाउन हॉल म आयोजित “हमारा संविधान, हमर स्वाभिमान” कार्यक्रम म सामिल होइन। मुख्यमंत्री श्री साय ह उपस्थित जनसमूह के संग संविधान के प्रस्तावना के सामूहिक वाचन करिन अऊ संविधान के प्रति अपन निष्ठा व्यक्त करिन। ए बेरा म मुख्यमंत्री ह संविधान दिवस म आयोजित प्रदर्शनी के अवलोकन करिन। उमन संविधान उपर आधारित लघु फिल्म घलोक देखिन अऊ जनप्रतिनिधि मनके संग ए बेरा ल यादगार बनाए के बर सेल्फी लीन।
मुख्यमंत्री श्री साय ह कहिन के विश्व के सबले बड़का लोकतंत्र भारत हमेसा संविधान उपर आस्था रखत आगू बढ़त हे। संविधान हर एक नागरिक ल स्वतंत्रता के संग अपन बात रखे के अधिकार देथे अऊ अभिव्यक्ति के स्वतंत्रता ठउका करथे। उमन कहिन के विधायक अऊ सांसद जइसे पद म आम नागरिक मन के पहुँचना संविधान के ही उदार, समावेशी अऊ लोकतांत्रिक व्यवस्था के परिणाम हे।
मुख्यमंत्री ह संविधान निर्मात्री सभा म देश के सबो क्षेत्र मन के प्रतिनिधि मन के संविधान निर्माण म अमूल्य योगदान देहे ल स्मरण करिन। उमन विशेष रूप ले छत्तीसगढ़ ले भारत के संविधान निर्माण म महत्वपूर्ण भूमिका निभाने वाले वरिष्ठजन मन के स्मरण करत कहिन के छत्तीसगढ़ के ये ऐतिहासिक भागीदारी आज घलोक गरब के विसय हे अऊ ए महान जनप्रतिनिधि मनके विचारशीलता, लोकतांत्रिक मूल्य अऊ राष्ट्रनिर्माण के दृष्टि म हमेसा प्रेरणा देत रइही।
ए बेरा म विधायक श्री राजेश मूणत, विधायक श्री पुरंदर मिश्रा, विधायक श्री सुनील सोनी, संस्कृति विभाग के सचिव डॉ. रोहित यादव संग बड़ संख्या म प्रबुद्धजन अऊ गणमान्य नागरिक उपस्थित रहिन।