कोरिया Digital News Desk, धान खरीदी के तिहार चलत हे, फेर अब गड़बड़ी करइया मन के खैर नइ हे। कोरिया जिला प्रशासन ह धान खरीदी केंद्र मन मा अचानक छापा मार के हड़कंप मचा देहे हे। जाँच मा खराब धान (अमानक) अउ अवैध भण्डारण के बड़का मामला आगू आए हे।
कटगोड़ी मा 40 कुंटल धान फेल
बुधवार के बिहनिया जब अधिकारी मन के टीम ‘कटगोड़ी’ धान खरीदी केंद्र पहुँचिस, त उहाँ के नजारा देख के दंग रहि गें। उहाँ बिके बर आए करीब 40 कुंटल धान के क्वालिटी खराब रिहिस, जेला अधिकारी मन तुरंत रिजेक्ट (वापस) कर दिन। एती समिति प्रबंधक घलो ड्यूटी ले नदारद रिहिस, जेखर ऊपर कार्रवाई के निर्देश देहे गे हे।
दुकान अउ घर ले धान जप्त
सिर्फ केंद्र मा नइ, बाहर घलो कार्रवाई होइस। टीम ह ‘फर्म रुद्र कुमार’ के गोदाम मा छापा मार के 75 बोरा (30 कुंटल) अवैध धान जप्त करिस। उहें मुरमा गाँव मा किसान विशुन के घर ले 45 बोरा धान जप्त करे गे हे। एखर कागज-पत्तर ओमन नइ देखा पाइन।
जटासेमर अउ पोंडी मा घलो कार्रवाई
अइसने हाल बाकी केंद्र मन के घलो रिहिस, जटासेमर म नोडल अधिकारी कमलेश देवांगन ह जाँच मा किसान नीलकंठ के 24 बोरा धान ला खराब पाके वापस लहुटा दीन।
अइसनहे बचरा पोड़ी म किसान बृजमोहन के 65 बोरा अउ भईया लाल के 6 बोरा धान ला रिजेक्ट कर देहे गे हे।
जिला प्रशासन ह साफ चेतावन देहे हे के असली किसान ला कोनो दिक्कत नइ होवय, फेर कहूं कोनो कोचिया या बिचौलिया ह गड़बड़ी करही, त ओला बक्शे नइ जाय।
