जांजगीर-चांपा, छत्तीसगढ़ म विष्णुदेव साय सरकार के दू बछर पूरा होय के खुसी म जांजगीर-चांपा म ‘जनादेश परब’ के बड़ सुग्घर आयोजन होइस। ए मौका म दिल्ली ले आय केंद्रीय मंत्री जगत प्रकाश नड्डा ह कहिन के साय सरकार ह गरीब, किसान अउ मनखे मन बर जबर काम करे हे।
नड्डा जी ह बताइन के सरकार ह किसान मन के खाता म 1.25 लाख करोड़ रूपिया सीधा भेजे हे। भूमिहीन मजदूर मन ला 10-10 हजार रूपिया के मदद अउ महतारी वंदन योजना ले माई-लोगन मन ला ताकत मिले हे। राज्य म रेल बर बजट घलो 22 गुना बाढ़ गे हे।
मुख्यमंत्री विष्णुदेव साय ह कहिन के हमर सरकार के लक्ष्य ‘हर वर्ग’ तक विकास पहुँचाना हे। उमन कहिन के नक्सलवाद ला खतम करे बर हमन कम्मर कस लेहन अउ ‘नक्सल-मुक्त छत्तीसगढ़’ बना के ही मानबो। ‘विजन 2047’ के जरिए नवा छत्तीसगढ़ के खाका तइयार करे गे हे। ए कार्यक्रम म ‘सेवा के 2 साल’ किताब के विमोचन घलो करे गीस अउ मनखे मन ला पीएम आवास के चाबी सउंपे गीस। कार्यक्रम म जांजगीर के पहिचान कोसा अउ कांसा ले पहुना मन के आदर-सत्कार करे गिस।
“जे कहे रहेन, ओला करके देखाएन, अउ जे नई कहे रहेन, ओहू ला पूरा करेन”: केंद्रीय मंत्री जे.पी. नड्डा
