आरटीओ चालान भुगतान के बर केवल आधिकारिक वेबसाइट के उपयोग करे के अपील

रायपुर, छत्तीसगढ़ राज्य म आरटीओ ई-चालान ले जुड़े धोखाधड़ी के मामला आगू आवत हे। साइबर अपराधी परिवहन विभाग के वेबसाइट के नकली (क्लोन) पेज बनाके मनखे मन ल ट्रैफिक नियम तोड़े के डेरूवाए वाले संदेश भेजत हें। ए संदेश मन म देहे गए लिंक म किलिक करतेच मनखे मन के व्यक्तिगत जानकारी अऊ बैंक खाता ले पइसा चोरी हो जात हे। जे पाए के यातायात विभाग के अधिकारी मन ह आम नागरिक मन ले अपील करे हें के कोनो अनजान मैसेज लिंक एपीके फाइल या निजी मोबाइल नंबर ले भेजे गए लिंक म किलिक झन करव। अइसन लिंक पूरा फर्जी हो सकत हे।
सही ई-चालान के जानकारी अऊ भुगतान खातिर केवल विभाग के आधिकारिक वेबसाइट  के ही उपयोग करव। वेबसाइट म जाके “Pay Online” विकल्प म किलिक करव, फेर चालान नंबर अऊ कैप्चा कोड भरके “Get Detail” उपर किलिक करव। एखर बाद मोबाइल म आए ओटीपी डालके चालान के पूरा विवरण देखे जा सकत हे।
परिवहन विभाग ह स्पष्ट करे हे के यातायात पुलिस या परिवहन विभाग कोति ले जब भी ई-चालान करे जाथे, ओखर सूचना केवल इही आधिकारिक वेबसाइट के माध्यम ले पंजीकृत मोबाइल नंबर म भेजे जाथे। परिवहन विभाग नागरिक मन ले अपील करे हे के कभू भी कोनो अजनबी ल ऑनलाइन भुगतान झन करव अऊ अपन बैंक खाता ले जुड़े लेन-देन म पूरा सावधानी बरतव। कोनो प्रकार के फर्जी कॉल, संदेश या ऐप के संबंध म तुरंते अपन नजदीकी पुलिस थाना म शिकायत दर्ज करावव।