अचानकमार टाइगर रिजर्व म अवैध प्रवेश ऊपर कड़ा कार्रवाई

बिलासपुर, अचानकमार टाइगर रिजर्व के प्रतिबंधित कोर जोन ले लगे इलाका म अवैध रूप ले घुस के हथियार लहराय के मामला म अचानकमार प्रबंधन ह सख्त कार्रवाई करे हे। सोशल मीडिया म वायरल होए विडियो ल देखत वन विभाग के अधिकारी मन ह तुरंत पुलिस विभाग के सहयोग ले कार्रवाई करत तीन आरोपी मन ल गिरफ्तार कर लीन। ए दौरान 2 एयर राइफल अउ एक टाटा सफारी स्टॉर्म गाड़ी ल जब्त करे गे हे।
छत्तीसगढ़ म अचानकमार टाइगर रिजर्व (ATR) के प्रतिबंधित कोर जोन ले लगे क्षेत्र म हथियार लहराय अउ गोली चलाय (firing) के मामला म पुलिस ह तीन झन ल गिरफ्तार करे हे। पकड़ाए आरोपी मन के पहचान अजीत वैष्णव (26 साल), अनिकेत (27 साल) अउ विक्रांत वैष्णव (36 साल) के रूप म होय हे। तीनो के खिलाफ वन्यप्राणी संरक्षण अधिनियम, 1972 के धारा मन के तहत अपराध दर्ज कर के ओमन ल कोर्ट (न्यायालय) म पेस करे गीस, जिहां ले कोर्ट ह ओमन ल न्यायिक रिमांड म जेल भेज दीस हे।
विभागीय कार्रवाई के तहत तुरंत प्रभाव ले बैरियर गार्ड ल हटा दे गे हे अउ संबंधित परिक्षेत्र अधिकारी ल कारण बताओ नोटिस (Show Cause Notice) जारी करे गे हे। पूरा मामला के जांच बर सहायक संचालक (कोर) ल जांच अधिकारी बनाय गे हे। वन विभाग ह साफ कर दे हे के टाइगर रिजर्व क्षेत्र म अवैध प्रवेश अउ वन्यप्राणी मन ल नुकसान पहुचाये वाला कोनो भी काम ल बर्दाश्त नइ करे जाय।
वन विभाग ह आम जनता ले अपील करे हे के सुरक्षित वन क्षेत्र म कोनो भी किसम के अवैध गतिविधि के जानकारी तुरंत विभाग ल देवव, ताकि वन्यजीव अउ प्राकृतिक संसाधन मन के सुरक्षा ठउका करे जा सकय।