बस्तर के कोना-कोना मा शांति अऊ खुशहाली लाय बर सरकार उंचाए हे बाना – उप मुख्यमंत्री श्री विजय शर्मा।
जगदलपुर, छत्तीसगढ़ के उप मुख्यमंत्री श्री विजय शर्मा ह कहे हें के विष्णु देव साय सरकार ह बस्तर के हर कोना मा शांति अऊ खुशहाली लाय बर बाना उंचाए हे। उमन बताइन के सरकार के उदीम ले अब बस्तर के अंदरूनी इलाका मन मा घलो विकास के अंजोर पहुंचत हे अऊ नक्सलवाद के प्रभाव कम होवत हे।
श्री शर्मा ह ‘नियद नेल्लानार’ (हमर अच्छा गांव) योजना के तारीफ करत कहिन के ए योजना के माध्यम ले सुरक्षा कैंप के 5 किलोमीटर के दायरा मा अवइया गांव मन मा मूलभूत सुविधा जइसे – सड़क, बिजली, पानी, अस्पताल अऊ स्कूल पहुंचाये जावत हे। उमन जोर देके कहिन के सुरक्षा कैंप सिरिफ नक्सली मन ले लड़े बर नइ हे, भलुक ये जनता के सुविधा अऊ विकास बर एक माध्यम बनत हे।
उप मुख्यमंत्री जी ह ए बात घलो कहिन के अब बस्तर के आदिवासी भाई-बहिनी मन के भरोसा सरकार अऊ प्रशासन ऊपर बाढ़त हे। पुलिस अऊ सुरक्षा बल मन न सिरिफ सुरक्षा देवत हें, भलुक लोगन के दुख-सुख मा घलो संगी बनत हें। सरकार के लक्ष्य हे के बस्तर के हर एक गांव मा विकास के गाड़ी पहुंचय अऊ लोगन ल भयमुक्त जीवन मिल सकय।
